शनिवार, कार्तिक १५ गते २०८३
- ट्रेण्डिङ :
- # समाज
- # मनाेरञ्जन
एजेन्सी । रुसी राष्ट्रपति भ्लादिमिर पुटिनले अमेरिकी राष्ट्रपति जो बाइडनलाई एक कडा चेतावनी दिएका छन् ।
युक्रेनमाथि आक्रमणको तयारी गरिरहेको रुसले अमेरिकाले यदि युक्रेनसँग जोडेर नयाँ प्रतिबन्धहरू लगाएमा अमेरिकासँग समेत सम्बन्ध तोड्ने चेतावनी दिएको हो ।
बिहीवार अबेर अमेरिकी राष्ट्रपतिसँग भएको टेलिफोन वार्तामा पुटिनले त्यस्ता प्रतिबन्धहरू लगाएमा ‘ठूलो भूल’ हुने बताएका हुन् ।
उता बाइडनले पनि रुसद्वारा युक्रेनमाथि हुने जुनकुनै हस्तक्षेपलाई अमेरिका र उसका साझेदारले डटेर जवाफ दिने बताएका छन् ।
अमेरिकी गुप्तचरहरुले भने रुसले युक्रेनमाथि हमलाको तयारी गरिरहेको र युक्रेनको सीमामा १ लाख सेना पठाएर उसले घेराबन्दी गरिसकेको जनाएका छन् । तर रुसी राष्ट्रपतिले भने हमलाको अन्तिम निर्णय गरिनसकेको जनाइएको छ ।
युक्रेन मामिलामा बढ्दो तनाव कम गर्न रुसकै आग्रहमा अमेरिकासँग त्यस्तो संवाद भएको बताइएको छ ।
एक महिनामै दुई राष्ट्रपतिबिच भएको पछिल्लो संवाद दोस्रो हो ।
उनीहरू बीचको कुराकानी झन्डै एक घण्टा चलेको बिबिसीले जनाएको छ । संवादमा बाइडनले राष्ट्रपति पुटिनलाई कूटनीतिक समाधान खोज्न र सैन्य हस्तक्षेपमा नजान भनेको बताइएको छ ।
युक्रेनी अधिकारीहरूले रुससँगको पूर्वी सीमानजिक एक लाखभन्दा धेरै रुसी फौज तैनाथ भएको बताइरहँदा तनाव मत्थर पार्नेबारे अमेरिका र रुसबीच पछिल्ला प्रयास भएका हुन् । तर मस्कोले हमलाको योजना नरहेको बताउँदै ती फौजहरू अभ्यासका क्रममा त्यहाँ रहेको जनाएको छ ।
उसले रुसी सीमाभित्र सैनिकहरू स्वतन्त्र रूपले सर्न पाउनु आफ्नो अधिकार रहेको बताएको हो । अमेरिकाले पनि युक्रेनमाथि हस्तक्षेप भएमा कडा प्रतिबन्धहरु लगाइने चेतावनी दिएको छ ।
