नेपाल कम्युनिष्ट पार्टी (नेकपा)मा देखिएको विवाद समाधानका लागि अध्यक्षद्वय केपी शर्मा ओली र पुष्पकमल दाहाल 'प्रचण्ड'ले गठन गरेको कार्यदलले झिनामसिना कुरा समेटेर प्रतिवेदन तयार गरेको छ । भोलिसम्म कार्यदलले प्रतिवेदन अध्यक्षद्वयलाई बुझाउने तयारी गरेको छ ।
ओली-प्रचण्डले महासचिव विष्णु पौडेलको संयोजकत्वमा भीम रावल, सुरेन्द्र पाण्डे, पम्फा भुसाल, जनार्दन शर्मा र शंकर पोखरेल सदस्य रहेको कार्यदल गठन गरेका थिए । कार्यदलले छिट्टै प्रतिवेदन तयार गर्ने जिम्मेवारी पाएको थियो ।
छलफलमै रहेका कार्यदलका एक सदस्यले झिनामसिना कुरा समेटेर प्रतिवेदन तयार भएको जानकारी दिए । उनले भने, 'हामीले प्रतिवेदन त लगभग तयार गरिसक्यौँ । तर, झिनामसिना कुरा समेटिएको छ । पार्टीले सरकार सञ्चालन गर्नूपर्ने र एक व्यक्ति एक जिम्मेवारीका विषयमा खासै सहमति जुटेन ।'
प्रतिवेदन सकभर भोलिसम्ममा अध्यक्षद्वयलाई बुझाउने तयारी भएको ती सदस्यले जानकारी दिए । उनले भने, 'भीम रावल कमरेड काठमाडौं बाहिर जानु भएकाले फाइनल हुन पाएको छैन । उहाँ आएपछि एक पटक सबैजनाले छलफल गरेर प्रतिवेदनलाई अन्तिमरुप दिन्छौँ । भोलिसम्ममा प्रतिवेदन बुझाउने हाम्रो तयारी छ ।'
राष्ट्रिय पुनर्निमाण प्राधिकरणका प्रमुख कार्यकारी अधिकृत सुशील ज्ञवालीको भैँसेपाटीस्थित घरमा बसेको बैठक असम्बन्धित व्यक्तिको घरमा भनेर विरोध भएपछि पार्टी कार्यालयमा बैठक बस्न थालेको थियो । बिहीबार बालुवाटारमा बसेको थियो ।
नेकपा कार्यदलले प्रतिवेदन तयार गरेको ती सदस्यले जानकारी दिए । उनले भने, 'हामीले अध्यक्षको प्रष्ट कार्यविभाजन, पार्टीको महाधिवेशन, मन्त्रिमण्डलका सदस्य परिवर्तन, केही मुख्यमन्त्रीको हेरफेर, राजनीतिक नियुक्तिलगायतका विषयमा सुझाव दिने तयारी गरेका छौँ ।'
