बुधवार, कार्तिक १९ गते २०८३
- ट्रेण्डिङ :
- # समाज
- # मनाेरञ्जन
जनता समाजबादी पार्टीका केन्द्रीय सदस्य दीर्घराज श्रेष्ठले पार्टी छाडेका छन् । उनी आजबाट माओवादी केन्द्र प्रवेश गरेका छन । आज जनयुद्ध दिवसको अवसर पारेर उनी पार्टी अध्यक्ष प्रचण्डद्वारा काठमाडौंमा माओवादी पार्टी प्रवेश गरेका हुन् । श्रेष्ठ जिल्लाका पुराना माओवादी नेता पनि हुन ।
तत्कालीन जसपा पार्टीमा उनी ३ नम्बर प्रदेश समितिका सहइन्चार्ज समेत थिए । जिल्लामा जसपा बनाउने अभियानका संयोजक समेत रहेका श्रेष्ठ पूर्वप्रधानमन्त्री बाबुराम भट्टराईका प्रिय पात्र समेत मानिन्थे ।
पूर्वप्रधानमन्त्री भट्टराई भारतबाट अध्ययन सकेर नेपाल फर्केपछि सिन्धुलीका दीर्घराज श्रेष्ठ निरन्तर भट्टराईसँगै थिए । श्रेष्ठ माओवादीमा गएपछि भट्टराईको पार्टी जसपालाई नराम्रो झट्का लागेको जानकारहरु बताउँछन् ।
श्रेष्ठले जसपा पार्टी छाडेपछि प्रतिक्रिया दिँदै जसपा सिन्धुलीका नेता अरुण आलेले भने, ‘दीर्घराज दाइको अभाव पार्टीमा रहने छ ।’ सिन्धुली जिल्ला र केन्द्रका नेताहरूलाई आफू पार्टी छोड्ने तयारीमा रहेको श्रेष्ठले जानकारी दिएका थिए ।
तीन दिन पहिला पूर्वप्रधानमन्त्री भट्टराईलाई भेट गरेर उनले आफुले पार्टी छोड्दै गरेको औपचारिक जानकारी दिएको बताए । भट्टराईले जसपा ढिलोचाँडो बिस्तारै बन्ने अन्तँ जान हतार नगरेको भए हुने थियो भन्ने प्रतिक्रिया दिएका थिए ।
नयाँ शक्तिदेखि जसपासम्म पार्टी टुटफुट भइरहेकाले पार्टी बन्न समय लाग्ने निक्र्यौलका साथ श्रेष्ठ माओवादी प्रवेश गरेको नागरिकखबरलाई प्रतिक्रिया दिएका छन ।
श्रेष्ठले भने, ‘मेरा भाइहरु पनि जनयुद्धमा लाग्दा सहिद भएका छन । माओवादी पार्टीले पनि मलाई आवश्यक ठान्यो मैले पनि केही योगदान गर्न सक्छु कि भनेर यता लागेको हो ।’
माओवादीमा लाग्दा के जिम्मेवारी पाउनुभयो ? भन्ने नागरिकखबरको प्रश्नमा श्रेष्ठले भने, ‘मैले पार्टीमा माग्ने कुरा हुँदैन, पार्टीले जे जिम्मेवारी दिन्छ त्यही कार्यान्वयनमा लाग्नेछु ।’
