मंगलवार, कार्तिक १८ गते २०८३
- ट्रेण्डिङ :
- # समाज
- # मनाेरञ्जन
नेकपा (माओवादी केन्द्र)का अध्यक्ष पुष्पकमल दाहाल‘प्रचण्ड’ले डेढ–दुई महिनामा मधेसलाई क्रान्तिकारीमय र माओवादीमय बनाउनुपर्ने बताएका छन् ।
मंगलबार जनकपुरधामको तिरहुतिया बरगाछिमा भएको प्रशिक्षण कार्यक्रममा उनले स्थानीय तहको निर्वाचनमा पार्टीका लागि जीवनमरणको विषय भएको बताए ।
उनले माओवादी हार्दा देश हार्ने दाबी गरे । “यो निर्वाचन अरुका लागि चुनाव मात्र हो । तर, हाम्रा लागि जीवनमरणको विषय हो । हामी हार्दा देश हार्छ । अरु हार्दा देश जित्छ,” प्रचण्डले भने । उनले गठबन्धनको आशा गरेर ‘रिल्याक्स’ नगर्न पनि नेता/कार्यकर्तालाई निर्देशन दिए ।
“गठबन्धनको आशा गरेर रिल्याक्स नगर्नुस् । आफ्नो खुट्टा बलियो बनाउनुस्,” उनले भने । त्यस्तै, उनले मधेसका युवालाई भाडभैलो गर्न खोज्नेलाई इँटको जबाफ पत्थरले दिन पनि भनेका छन् ।
गरिब किसान, मजदुर, भूमिहीन, महिला, दलित, जनजाति, हिमाली आदिवासी, सीमान्तकृत समुदाय सबैलाई समावेशी र समानुपातिक प्रतिनिधित्व माओवादीको कारण भएको उनले उल्लेख गरे । यस्तै, प्रचण्डले नेकपा (एमाले)का कारण नागरिकता विधेयक रोकिएको बताए ।
“तथाकथित कम्युनिस्ट भन्ने गैरकम्युनिस्टले नै मधेसी जनताको अधिकारमाथि खेलवाड गरेको छ,” उनले भने,“नागरिकता विधेयक पनि एमालेको कारण रोकिएको छ । हामीले जनतामा गएर यो भनिदिनुपर्छ ।”
