एजेन्सी । अमेरिकाको मोडेर्ना कम्पनीले तयार पारेको कोरोना भाइरसविरुद्धको खोपको बारेमा निकै सकारात्मक खबर आएको छ । तेस्रो चरणको क्लिनिकल ट्रायल चलिरहेको खोपले सुरुवाती समयमै आसा लाग्दो नतिजा दिएको हो । जसअनुसार यो खोपले बृद्ध बृद्धाहरुमा रोगप्रतिरोधी क्षमता बढाएको कम्पनीले जनाएको छ ।
मोडेर्नाले जनाए अनुसार ५६ देखि ७० बर्षका १० जना र ७१ बर्ष भन्दा माथीका १० जनालाई परीक्षणमा सहभागी गराइएको थियो । सबैलाई २८ दिनको अन्तरमा १०० एमजीको डोज दिइएको थियो । परीक्षणमा सहभागीहरुको शरीरमा न्युट्रिलाइजिङ एन्टिबडीको राम्रो विकास भएको देखियो ।
वैज्ञानिकहरुका अनुसार कोरोना भाइरसलाई जित्न यो एन्टिबडी अत्यन्तै आवश्यक हुन्छ । परीक्षणमा सहभागी स्वयंसेवकहरुको शरीरमा देखिएको एन्टिबडी कोरोना संक्रमणपछि निको भएका मानिसहरुमा भन्दा बढी रहेको माडर्ना कम्पनीले बताएको छ । यो खोप लिने स्वयंसेवकहरुमा कुनै पनि गम्भीर खालको असरहरु देखिएन । केहीलाई हल्का टाउको दुख्ने र थकानको महसुस भए पनि दुई दिनमै ठिक भएको कम्पनीले जनाएको छ ।
अमेरिकामा थुप्रै खोपहरुमाथीको अनुशन्धान चलिरहेको छ । यस मध्ये मोडेर्ना कम्पनीको खोपलाई उत्कृष्ट स्तरमा राखिएको छ । विश्व स्वास्थ्य संगठन (डब्ल्युएचओ) ले जनाए अनुसार हालसम्म कुल १७० वटा खोपहरुमाथी अनुशन्धान र परीक्षण चलिरहेको सिएनबिसीले जनाएको छ ।
