मंगलवार, कार्तिक १८ गते २०८३
- ट्रेण्डिङ :
- # समाज
- # मनाेरञ्जन
नेपाली काँग्रेसले सत्ता गठबन्धनका विरुद्धमा नजान मातहतका कमिटीलाई निर्देशन दिएको छ । शुक्रबार केन्द्रीय कार्यालय सानेपामा बसेको काँग्रेसको स्थानीय तह निर्वाचन परिचालन समितिको बैठकले गठबन्धनका विरुद्धमा नबोल्न र नजान निर्देशन दिएको हो ।
बैठकमा पार्टी उपसभापति तथा समितिका संयोजक पूर्णबहादुर खड्काले गठबन्धनका बाध्यता बुझिदिन कार्यकर्तालाई आग्रह पनि गरेको थिए । उनले भने, ‘अहिले गठबन्धन हाम्रो रहर होइन ।
बाध्यता हो । केपी ओलीले संविधान उल्लंघन गरी प्रतिगमन झल्किँदै सरकार सञ्चालन गरेपछि बाध्य भएर काँग्रेसले सरकार सम्हालेको हो ।
संविधान जोगाउन गठबन्धन बनेकाले गठबन्धन जोगाउन हाम्रो बाध्यता छ ।’ यस्तै गठबन्धनको सरकार सञ्चालन गरिरहेका बेला निर्वाचन हुन लागेकाले सोही दल मिलेर निर्वाचन लड्ने कुरा सजिलो हुने काँग्रेसको निष्कर्ष निकालेको छ ।
‘अहिले गठबन्धनमा आ–आफ्नो विचार राखौं । लचिलो गरी पनि छलफल गरौं,’ खड्काले भने, ‘र पार्टीले सर्वसम्मत ढंगबाट चुनावी तालमेल गर्ने निर्णय गरेकाले त्यसका विरुद्धमा मत राख्ने काम नगर्दा राम्रो हुन्छ ।
नगर्नुहोला ।’ आजसम्म बोलेपनि अब चुनावी तालमेलका विरुद्धमा नबोल्न उनको कडा निर्देशन छ । प्रदेश, जिल्ला, संघीय निर्वाचन क्षेत्रीय समितिलाई सर्वसम्मत उम्मेदवार चयनमा जोड दिन निर्देशन दिएका थिए ।
‘सम्बन्धित निकायले उम्मेदवार चयन सकेसम्म सर्वसम्मत गर्नुहोला । सर्वसम्मत गर्न सक्नुभएन भने तहगत रुपमा माथि पठाउनुहोला । सकभर तलै मिलाउने काम गर्नुहोला,’ खड्काले भने ।
काँग्रेसले स्थानीय तह निर्वाचनका लागि सबै प्रदेश, पालिकामा केन्द्रीय प्रतिनिधि पठाउने निर्णय गरेको छ । केन्द्रबाट खटाइएका प्रतिनिधिले सम्बन्धित ठाउँमा गठबन्धनभित्र परेका समस्या समाधान गर्न उपसभापति खड्काले निर्देशन दिए ।
