शनिवार, कार्तिक १५ गते २०८३
- ट्रेण्डिङ :
- # समाज
- # मनाेरञ्जन
म्यानमारको जुन्ता अदालतले अपदस्थ नेतृ आङ सान सुचीलाई भ्रष्टाचार आरोपमा दोषी ठहर गर्दै बुधबार पाँच वर्षको जेल सजाय सुनाएको छ ।
७६ वर्षीया नोबेल पुरस्कार विजेता सुचीमाथि ६ लाख डलर नगद र सुन घुस लिएको आरोप लागेको थियो । यो सजायसँगै उनी ११ वर्ष कैदमा बस्नुपर्ने भएको छ ।
गत डिसेम्बरमा सुचीलाई कोभिड प्रतिबन्ध उल्लंघन गरेको मुद्दामा र जनवरीमा प्रतिबन्धित वाकीटकी राखेको मुद्दामा दोषी ठहर गरिएको थियो ।
सुनुवाइका क्रममा अदालतमा पत्रकारहरूलाई उपस्थित हुन प्रतिबन्ध लगाइएको थियो । त्यस्तै, सुचीका वकिलहरूलाई सञ्चारकर्मीसँग बोल्न पनि रोक लगाइएको थियो ।
गत वर्ष फेब्रुअरीमा सैन्य कुमार्फत सत्ताच्युत भएपछि सरकारले सुचीमाथि दर्जनौँ फौजदारी अभियोग लगाएको छ । उनीमाथिका अभियोग पुष्टि भएमा सुची वर्षौँसम्म जेलमा बस्नुपर्ने छ ।
आफूमाथिका सबै आरोपहरूको सुचीले अस्वीकार गरेकी छन् । त्यस्तै, अदालतको सुनुवाइ निष्पक्ष नभएको अधिकारकर्मीहरूको भनाइ छ । अपदस्थ भएयता उनी घरमै नजरबन्दमा रहेकी छन् ।
