आइतवार, कार्तिक १६ गते २०८३
- ट्रेण्डिङ :
- # समाज
- # मनाेरञ्जन
आइतबार राति कतारका लागि उड्नुपर्ने जजिरा एयरलाइन्सको विमान भैरहवास्थित गौतम बुद्ध अन्तर्राष्ट्रिय विमानस्थलमै रोकिएको छ ।
अवतरण गर्ने क्रममा विमानमा चरा ठोक्किएको आशंकापछि जजिरा एयरलाइन्स गौतम बुद्ध अन्तर्राष्ट्रिय विमानस्थलमै रोकिएको हो । विमानस्थलका निमित्त महाप्रबन्धक तथा प्रवक्ता श्याम किशोर साहका अनुसार कतारबाट नियमित उडान तालिकाअनुरुप उडान भरेर गौतम बुद्ध अन्तर्राष्ट्रिय विमानस्थलमा अवतरण गर्ने क्रममा विमानमा चरा ठोक्किएको विमानका चालकले बताएका थिए ।
‘उक्त जानकारी पाउनासाथ तत्काल विमानको जाँच गर्दा जहाजको अगाडि नोजमा र इन्जिन बाहिरको कभरमा रगतको टाटा देखियो‚’ उनले भने ।
विमानमा चरा ठोक्किएको हुन सक्ने तर, ठोक्किएको चराको अवशेष भने कतै पनि फेला नपरेको उनको भनाई छ ।
विमान र रन(वेमा कतै पनि ठोक्किएको चराको अवशेष फेला नपरेपछि चरा विमानको इन्जिनभित्र पसेको हुन सक्ने शंकाले प्राविधिक जाँच गर्नका लागि विमान रोकिएको उनले जानकारी दिए ।
विमानको जाँचका लागि काठमाडौंबाट प्राविधिक आउने र सबै चेकजाँच गरेर विमान सुरक्षित रहेको प्रमाणित भएपछि मात्र बल्ल उडान गर्नेछ ।
जजिरा एयरलाइन्सको एयरबस-३२० विमान १ सय २१ जना यात्रु लिएर आइतबार राति २ बजे भैरहवामा अवतरण गरेको थियो । यो विमानले कतार÷भैरहवाबीच हवाई उडान गरेको चौथो पटक हो ।
