शनिवार, कार्तिक १५ गते २०८३
- ट्रेण्डिङ :
- # समाज
- # मनाेरञ्जन
दयाहाङ राई स्टारर ‘कबड्डी’को चौथो श्रृंखलाले दुई सातामा १८ करोड ७८ लाख रुपैयाँ ग्रस कमाएको छ । १४ दिनमा फिल्मले काठमाडौं उपत्यकामा ९ करोड ९८ लाख र मोफसलमा ८ करोड ८० लाख ग्रस कमाएको हो ।
डेढ सय बढी हलबाट प्रदर्शन भएको फिल्मको कमाइमा हलिउड र बलिउड रिलिजको खास प्रभाव नै देखिएको छैन । (शुक्रबार) शुक्रबारदेखि तेस्रो साता प्रवेश गर्दै ‘कबड्डी ४’ले अकुपेन्सीमा केही ड्रप भए पनि स्थिर कमाइलाई निरन्तरता दिने देखिएको छ ।
तेस्रो सप्ताहन्तमा फिल्मले २० करोड ग्रसको आँकडा पार गर्ने प्रक्षेपण गरिएको छ । निर्माता तथा निर्देशक रामबाबु गुरुङ र वितरक मनोज राठीका अनुसार मुख्य मल्टिप्लेक्स चेन क्यूएफएक्समा मात्र दुई सातामा फिल्मले ५ करोड ६३ लाख ग्रस कमाएको छ ।
आईएनआईमा मात्र ३ करोड १० लाख ग्रस कलेक्सन छ । विगतमा काठमाडौंलाई फिल्मको ७५ प्रतिशत बजार मानिने गरे पनि मोफसलमा बढ्दो जनसंख्या र आधुनिक फिल्म हलको विस्तारसँगै बक्स अफिस आकार पनि बढेको अनुमान छ । ‘कबड्डी ४’ले विदेशमा समेत कीर्तिमानी कमाइ गरिरहेको छ ।
अमेरिकाबाटै ४ करोड ग्रस कमाइ गर्ने जानकारी वितरकले दिएका छन् । शो संख्या र डलरको मूल्य विश्लेषण गर्दा त्यहाँको कमाइ त्यति प्रक्षेपण गरिएको छ ।
अष्ट्रेलियामा लाइफटाइम कलेक्सन डेढ करोड ग्रस पुग्ने अनुमान छ । जापानमा ७० लाख प्रक्षेपण छ । अस्ट्रेलिया, अमेरिका र जापानमा कीर्तिमानी कमाइ भएको निर्देशक गुरुङको भनाई छ । विदेशको राइट बिक्रीबापत निर्माताले २ करोड २१ लाख रुपैयाँ नेट प्राप्त गरेको उनले बताएका छन् ।
भारतमा जुन १७ तारिखमा फिल्म प्रदर्शनको तयारी छ । ‘कबड्डी ४’ले विदेशबाट कुल १० करोड ग्रस कमाउने प्रक्षेपण गरिएको छ । नेपालमा चाहिं यो फिल्म जेठ १३ गते रिलिज भएको थियो ।
