सोमवार, कार्तिक १७ गते २०८३
- ट्रेण्डिङ :
- # समाज
- # मनाेरञ्जन
नेकपा एमालेका अध्यक्ष केपी शर्मा ओलीले पार्टीभित्रै अन्तर्घातका कारण स्थानीय तह निर्वाचनमा पराजित हुनुपरेको बताएका छन् ।
बिहीबार पार्टीबाट निर्वाचित जनप्रतिनिधिहरुलाई प्रशिक्षण दिने कार्यक्रममा अध्यक्ष ओलीले एमालेलाई विरोधी शक्तिले हराउन नसक्ने भएपनि पार्टीभित्रैबाट घात गर्नेहरु निस्केको बताए ।
अंग्रेजले बंगाल आक्रमण गर्दा बंगालका सेनापति मिरजाफर र मिरकासिमले अंग्रेजलाई सहयोग गरेको उदाहरण दिँदै अध्यक्ष ओलीले भने, ‘हाम्रा विरोधीले केही गर्न सक्ने थिएनन्, हामी त झण्डै दुई तिहाइमा थियौँ । तर हाम्रैभित्रबाट सकुनीहरु निस्किए, मिरजाफरहरु निस्किए ।’
एमालेले माग्यो अर्थमन्त्रीको राजीनामा
प्रमुख प्रतिपक्षी नेकपा एमालेले अर्थमन्त्री जनार्दन शर्माको राजीनामा माग गरेको छ । बिहीबार प्रतिनिधिसभा बैठकमा एमालेले अर्थमन्त्रीको विरोध गर्दै राजीनामा माग गरेको हो ।
एमालेका सांसद भानुभक्त ढकालले ३ दिनदेखि प्रतिनिधिसभाको ध्यानाकर्षण गराइरहेको बताउँदै अर्थमन्त्री बिचौलियाको चंगुलमा परेर करका दरहरू परिवर्तन गरेको र राष्ट्रघात गरेका कारणले राजीनामा दिनुपने बताए ।
अर्थमन्त्री शर्माको राजीनामा मागिरहँदा त्यसलाई बेवास्ता गरेर फेरि त्यही विषय ल्याइएको भन्दै एमालेले गम्भीर असहमति जनाएको छ । राष्ट्र बैंकका गभर्नरलाई निलम्बन गर्दा अदालतले सफाई दिएपछि नै राजीनामा दिनुपर्नेमा त्यसपछि अर्थमन्त्री शर्मा झनै हौसिएको ढकालको भनाइ छ ।
उनले भने, ‘बिचौलियाहरूलाई करका दरहरू परिवर्तन गर्ने र राष्ट्रलाई आघात पार्ने जुन काम भएको छ । यो पछिल्लो गतिविधिबाट सरकारले अर्थमन्त्रीलाई हटाउन सकेको छैन । हामीलाई के संका लाग्छ भने अर्थमन्त्रीभन्दा माथि पनि यसका जराले धर गरेको छ कि भन्ने ठाउँमा हामी पुगेका छौं ।’ त्यसपछि एमाले सांसदहरु आसनबाट उठेर विरोध जनाएका थिए ।
