सोमवार, कार्तिक १७ गते २०८३
- ट्रेण्डिङ :
- # समाज
- # मनाेरञ्जन
नेकपा एमालेले सुनसरी १ मा जनता समाजवादी पार्टीका नेता अशोक राईलाई सघाउने भएपछि कार्यकर्ताले विद्रोह गरेका छन् ।
एमालेको सुनसरी क्षेत्र नम्बर १ स्थानीय कमिटीको सिफारिसविपरीत अध्यक्ष केपी शर्मा ओलीले जसपालाई दिने निर्णय गरेपछि एमाले कार्यकर्ता विद्रोहमा उत्रिएका हुन् ।
सुनसरी १ एमालेको बलियो पकड क्षेत्र मानिन्छ । अध्यक्ष ओलीको निर्णयअनुसार सुनसरी १ मा जसपा नेता अशोक राई उठ्ने भएका छन् ।
एमाले सुनसरीले १ नम्बर क्षेत्रका लागि निवर्तमान सांसद जयकुमार राईको नाम सिफारिस गरेको थियो । स्थानीय कमिटीको सिफारिसविपरीत जसपालाई दिएपछि स्थानीय कार्यकर्ताले धरानका पूर्वमेयर मनोज मेयाङ्बोलाई स्वतन्त्र उठाउने तयारी गरेको छ ।
आफ्नो बलियो पकड भएको क्षेत्रमा अर्कैलाई टिकट दिएपछि कार्यकर्तामा तीव्र असन्तुष्टि देखिएको बताउँदै उनले स्वतन्त्र उठ्न आफूमाथि दबाब परेको बताए ।
उनले आजै उम्मेदवारी घोषणा गरेर मनोनयन दर्ता गर्ने बताए । स्थानीय कमिटीको सिफारिसमा परेर पनि टिकट खोसिएका राईले पनि जसपालाई सघाउने पार्टी केन्द्रको निर्णयप्रति आक्रोश व्यक्त गरेका छन् ।
उनले पार्टीको निर्णयबारे धेरै नबोल्ने बताउँदै भने, ‘म पार्टी केन्द्रको निर्णय मान्छु तर यहाँ कार्यकर्ताको विद्रोह रोक्न सकिने अवस्था छैन ।’ एमाले चुनावी तालमेलपछि प्रदेश १ का मोरङ ५ र सुनसरी १ जसपालाई दिने निर्णय गरिसकेको छ ।
त्यस्तै झापा ३ राप्रपालाई छाडेको छ ।
