- ट्रेण्डिङ :
नेपाल कम्युनिष्ट पार्टी (नेकपा)को स्थायी कमिटीको तेस्रो दिनको बैठकमा उपाध्यक्ष वामदेव गौतमले आफूसहित १६ जनालाई न्याय दिन माग गरेका छन् । सीमा समस्यामा केन्द्रित रहेर धारणा राख्ने क्रममा उपाध्यक्ष गौतमले तत्कालीन अवस्थामा आफूहरुले महाकाली नदीको मुहान किटान गर्नुपर्ने माग गर्दा वर्तमान नेतृत्वबाट कारबाही भोगेको स्मरण गरे ।
आफूसहित १६ जनालाई महाकालीको मुद्दा उठाउँदा कारबाही गरिएको भन्दै उनले एकीकृत पार्टीबाट न्यायको अपेक्षा गरेका छन् । उनले बैठकमा भने, 'महाकाली सन्धिगर्दा अहिलेकै नेतृत्वका साथीहरुले मसहित १६ जनालाई कारबाही गरेका थिए । हामीले उठाएको एजेण्डा आज आएर सहीसाबित भएको छ । अब हामीविरुद्धको कारबाही गल्ती थियो भनेर किन नभन्ने ? हामीलाई न्याय दिनुपर्छ ।'
एकीकृत पार्टीको तर्फबाट न्याय हुनेमा आशावादी रहेको बताउँदै उनले भने, 'त्यो बेलाका धेरै कुरा नगरौँ । तर हामीले महाकाली सन्धि ठिक छैन । त्यसको सैद्धान्तिक र व्यवहारीक पक्षमा नेपालविरुद्ध थियो । मुहान पनि किटान गरौँ भनिएकै थियो । त्यो गर्दा हामी १६जनाविरुद्ध कारबाही भयो । अहिले आएर सच्चाउनु पर्छ । हामीलाई न्याय चाहिँयो ।' महाकाली सन्धिको बिरोध गरेपछि वामदेव गौतमसहित १६ जनालाई तत्कालीन एमाले नेता (वर्तमान प्रधानमन्त्री) केपी ओलीकै प्रस्तावमा एमालेले कारबाही गरेको थियो ।
एक सचिवालय सदस्यका अनुसार आजको बैठकमा पनि प्रधानमन्त्रीसमेत रहेका अध्यक्ष केपी शर्मा ओलीले केही नभनिकनै बाहिरिएका थिए । ओली बाहिरिएपछि कार्यकारी अध्यक्ष पुष्पकमल दाहाल प्रचण्डले अध्यक्षले आफूसँग बिरामी भएकाले जान्छु भनेर निस्किएको जानकारी गराए ।
Source : nagarikkhabar
