आइतवार, कार्तिक १६ गते २०८३
- ट्रेण्डिङ :
- # समाज
- # मनाेरञ्जन
म्याग्दीको प्रदेशसभा क्षेत्र (२) बाट नेकपा माओवादी केन्द्रका रेशम जुग्जाली (सुविन) निर्वाचित भएका छन् ।
नौ हजार ४५४ मत ल्याएर जुग्जाली गण्डकी प्रदेशसभा सदस्यमा निर्वाचित भएका हुन् । सत्तारुढ गठबन्धनको समर्थन पाएका जुग्जालीका प्रतिस्पर्धी नेकपा एमालेका यामबहादुर जुग्जालीले नौ हजार ३५३ मत पाएका मुख्य निर्वाचन अधिकृत कृष्णप्रसाद नेपालले बताए । १०१ मतान्तरले रेशम निर्वाचित भएका हुन् ।
३७ हजार ६४८ जना मतदाता रहेको प्रदेशसभा क्षेत्र (२) मा आइतबार भएको निर्वाचनमा २१ हजार सात मत खसेको थियो । ३९ वर्षीय जुग्जाली नेकपा माओवादी केन्द्रका म्याग्दी जिल्ला संयोजक हुन् ।
मालिका गाउँपालिका–७ का जुग्जाली २०५७ देखि माओवादीमा आवद्ध छन् । २०७४ मा मालिका ७ को वडा अध्यक्षमा निर्वाचित जुग्जाली गत वैशाखको स्थानीय तह चुनावमा सोही पालिकाको अध्यक्षमा पराजित भएका थिए ।
जुग्जालीलाई सत्तारुढ नेपाली काँग्रेस, नेकपा एकिकृत समाजवादी र राष्ट्रिय जनमोर्चाले सर्मथन गरेका थिए ।
जनार्दन शर्माले लिए तेब्बर मतको अग्रता
एकमात्र प्रतिनिधिसभा निर्वाचन क्षेत्र रहेको रुकुम पश्चिममा नेकपा माओवादी केन्द्रका उम्मेदवार जनार्दन शर्मा ‘प्रभाकर’ले झण्डै तेब्बर मतको अग्रता लिएका छन् ।
हालसम्मको मतगणनाअनुसार प्रभाकरले १९४४ मत पाएका छन् भने उनका टिकटतम प्रतिस्पर्धी नेपका एमालेका उम्मेदवार नन्दराम देवकोटाले ७३४ मत मात्र पाएका छन् ।
अर्थमन्त्रीसमेत रहेका प्रभाकर २०६४ को संविधानसभा निर्वाचनयता यसै निर्वाचन क्षेत्रबाट निर्वाचित हुँदै आएका छन् । यसपटक पनि प्रभाकरको जित सुनिश्चित रहेको प्रक्षेपण हुने गरेको छ ।
रोल्पामा वर्षमान पुन ६ हजार १३० मतले अगाडि
एउटा मात्रै प्रतिनिधिसभा निर्वाचन क्षेत्र भएको रोल्पामा माओवादी केन्द्रका वर्षमान पुनले अग्रता फराकिलो पारेका छन् ।
पछिल्लो मत परिणाम अनुसार पूर्वअर्थमन्त्री पुनले उनका निकटतम प्रतिस्पर्धी नेकपा एमालेका पूर्ण बुढालाई दोब्बर बढी मतले पछाडि पारेका छन् ।
पुनले १० हजार ४३८ मत प्राप्त गरेका छन् । एमालेका बुढाले ४ हजार ३०८ मत प्राप्त गरेका छन् । यी दुई बीचको मतान्तर ६ हजार १३० रहेको छ।
