आइतवार, कार्तिक १६ गते २०८३
- ट्रेण्डिङ :
- # समाज
- # मनाेरञ्जन
जनता समाजवादी पार्टी नेपाल र नेकपा एकीकृत समाजवादी पार्टीबीच एकता हुनुभन्दा पहिले मोर्चा बनाउने सहमति भएको छ ।
दुई पार्टीबीच एकताका लागि हिजो भएको वार्तामा सो सहमति भएको हो । एकताका लागि केही समय लाग्ने भएका कारण छलफल गर्दै गर्ने र दुई पार्टीबीच मोर्चा बनाएर अगाडि बढ्ने सहमति भएको जसपाका वार्ता समिति सदस्य गोविन्द चौधरीले बताए ।
उनले भने, ‘दुई पार्टीबीच एकीकरणको प्रकृया अगाडि बढाउँदै गर्ने, त्यसअघि नै दुई पार्टीबीच मोर्चा बनाउने सहमति भएको छ । मोर्चाको मोडालिटीको विषयमा एक दुई दिनमै टुङ्गो लगाउने छौं ।’
भोलि हुने वार्तामा दुवै पक्षबाट आआफ्नो पार्टीको तर्फबाट एजेण्डा प्रस्तुत गर्ने र त्यसमा एकएक विषयमा छलफल गर्दै जाने सहमतिसमेत भएको छ । एजेण्डामाथि छलफल गर्दा सरल र जटिल विषयवस्तु सूचीकृत गर्दै जाने, सहमति हुन सक्नेमा विषयलाई टुङ्ग्याउँदै जाने सहमति भएको जनाइएको छ ।
जुन विषयमा सहमति हुन सक्दैन, त्यसलाई जटिल विषयवस्तुमा सूचीकृत गर्ने र त्यसलाई शीर्ष तहबाट नै टुङ्गो लगाउने सहमति भएको छ ।
भोलि बस्ने बैठकमा दुवै पार्टीले आआफ्नो पार्टीको घोषणापत्र, विधान, राजनीतिक प्रतिवेदन, पार्टीका अन्य दस्तावेजहरु लिएर आउने निर्णय गरेको छ । दुवै पार्टीका घोषणापत्र, विधान, राजनीतिक प्रतिवेदनका एक–एक विषयमा छलफल हुन्छ । र, त्यसबाट सरल र जटिल विषयवस्तु छनौट हुन्छ ।
