आइतवार, कार्तिक १६ गते २०८३
- ट्रेण्डिङ :
- # समाज
- # मनाेरञ्जन
अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु) २३ औँ राष्ट्रिय महाधिवेशनको तयारीमा जुटेको छ । पौष २३ र २७ गते काठमाडौँमा बसेको अनेरास्ववियुको बैठकले २३ औँ राष्ट्रिय महाधिवेशन २०७९ फागुन २–४ काठमाडौँको कमलादीस्थित प्रज्ञा प्रतिष्ठानमा गर्ने निर्णय गरेको थियो ।
सोही आधारमा अनेरास्ववियुले आफ्नो तयारी अगाडि बढाएको हो । केही वर्षदेखि सङ्गठनको व्यवस्थापनमा कहीँ न कहीँ चुकिरहेको भन्दै अनेरास्ववियुले सङ्गठनको आन्तरिक लोकतन्त्रलाई थप बलियो बनाउन महाधिवेशन गर्न लागेको हो । अनेरास्ववियुको महाधिवेशन ७ वर्षदेखि हुन सकेको छैन ।
गत असोज १ र २ गते काठमाडौँमा सम्पन्न तेस्रो नीति तथा विधान महाधिवेशनले ६ महिनाभित्रमा महाधिवेशन गर्ने म्याण्डेड दिएको थियो । अनेरास्ववियुले त्रिभुवन विश्वविद्यालयले चैत ५ गते गर्न लागेको स्ववियु निर्वाचनअघि नै महाधिवेशन गर्न लागेको हो ।
अनेरास्ववियुले अवधि पुरा भई सम्मेलन-अधिवेशन नभएका मातहतका कमिटीहरूको सम्मेलन-अधिवेशन माघ १५ गतेभित्र गर्ने निर्णय गरेको छ ।
माघ १५ गतेभन्दा पछाडि तोकिएका मातहत कमिटीका भेला-अधिवेशनहरू राष्ट्रिय महाधिवेशन सम्म स्थगित गर्ने निर्णय समेत बैठकले गरेको थियो ।
महाधिवेशनका लागि अध्यक्ष सुनिता बरालको संयोजकत्वमा मूल व्यवस्थापन समिति, सङ्गठनका महासचिव समिक बडालको संयोजकत्वमा प्रतिनिधि व्यवस्थापन समिति र सङ्गठनका कोषाध्यक्ष जेनिश लामाको संयोजकत्वमा आर्थिक समिति निर्माण गरिएको छ । अन्य उपसमितिहरू मूल व्यवस्थापन समितिको बैठक बसी निर्माण गरिने अनेरास्ववियुले जनाएको छ ।
