आइतवार, कार्तिक १६ गते २०८३
- ट्रेण्डिङ :
- # समाज
- # मनाेरञ्जन
कुवेत - निरेम प्रोडक्सन कुवेतको सातौ वार्षिकोत्सव तथा निरेम सांगीतिक उत्सव २०२३ सम्पन्न भएको छ ।
नेपालबाट आमन्त्रित अतिथि कलाकार चर्चित लोकप्रिय डान्सर कविता नेपाली , गायक कमल खत्री र गायिका मेलिना मैनाली तथा स्थानीय कलाकारको साथमा फ्रेब्रुअरी १० तारिख शुक्रवारको दिन कुवेतको जिलिपस्थित इन्डियन सेन्ट्रल स्कुलको हलमा सम्पन्न भएको हो ।
निरेम सांगीतिक उत्सव कार्यक्रम प्रेम जिमी याख्याको सभापतित्वमा सम्पन्न कार्यक्रममा नेपाली राजदूतावास कुवेतका महामहिम राजदूत दुर्गाप्रसाद भण्डारीको प्रमुख आतिथ्यता रहेको थियो । त्यसैगरी बिशेष अतिथिमा टिभियस ग्रुपका चियरमेन डा. एस.एम. हैदर अली रहेका थिए भने अथितिहरुमा एनआरएनए कुबेतका अध्यक्ष रणध्वज लामा तथा विभिन्न नेपाली संघ-संस्थाका अध्यक्ष तथा प्रतिनिधिहरु र पत्रकारहरु रहेका थिए ।
नेपाल पत्रकार महासंघ बैदेशिक शाखा कुवेतका अध्यक्ष नवराज पन्थीको सञ्चालन रहेको कार्यक्रममा सभापति , प्रमुख अतिथि , विशेष अतिथि लगायतले संयुक्त रूपमा दिप प्रज्वलन गरी कार्यक्रमको विधिवत् उद्घाटन गरिएको थियो । साथै फूलको गुच्छा सहित प्रमुख अतिथि , विशेष अतिथि तथा अतिथिहरुलाई सम्मान गरिएको थियो । निरेम प्रोडक्सनका सदस्य जयनारायण थारुले स्वागत मन्तव्यद्धारा उपस्थित सम्पूर्णलाई स्वागत गरेका थिए ।
कार्यक्रममा प्रमुख अतिथि महामहिम राजदूत दुर्गाप्रसाद भण्डारी, टिभियस ग्रुपका चियरमेन डा.एस.एम. हैदर अली एनआरएनए एनसिसी कुवेतका अध्यक्ष रण ध्वोज लामा, आदिवासी जनजाती महासँघ कुवेतका अध्यक्ष अमृत तामाङ , नेपाल पत्रकार महासंघ कुवेत शाखाका सहसचिब हरि बानियाँ लगायतले शुभकामना मन्तव्य दिएका थिए । निरेम प्रोडक्सनको संगीतमय कार्यक्रम भएकाले शुभकामना दिने व्यक्तिहरु भने सिमित मात्रामा थिए ।
नेपालबाट आमन्त्रित अतिथि कलाकार तथा स्थानीय कलाकारको जोडदार प्रस्तुतीले उपस्थित दर्शकले भरपूर मनोरञ्जन लिएका थिए । कुवेतमा हुने हरेक सांगीतिक कार्यक्रम भन्दा निरेम प्रोडक्सनको सांगीतिक कार्यक्रम फरक रहेको थियो । डिजिटल प्रविधि जडान सहित सञ्चालन भएको सांगीतिक कार्यक्रममा नयाँ पन दिएर कुवेतबासी नेपाली दर्शक स्रोता माँझ प्रस्तुत कार्यक्रम साँचिकै प्रशंसनीय
बनाउन सफल भएको छ । कार्यक्रम हलमा दर्शकहरु नेपालबाट आमन्त्रित अतिथि कलाकार चर्चित लोकप्रिय डान्सर कविता नेपाली, गायक कमल खत्री र गायिका मेलिना मैनालीको प्रस्तुतिमा झुमिरहेका थिए ।
अन्त्यमा नेपालबाट आमन्त्रित कलाकार र स्थानीय कलाकार तथा चियरमेन डा. एस.एम. हैदर अली , एनआरएनए कुबेतका उपाध्यक्ष होमनाथ गिरी तथा कार्यक्रम स्पोन्सर गर्ने बीईसी एक्सचेंज, सिटी एक्सप्रेस , नमस्ते गहना पसल , यलर ब्यूटी पार्लर , wwics worlds largest Resettlement लाई प्रमुख अतिथिले मायाको चिनो सहित सम्मान गरिएको थियो भने कार्यक्रमको अन्तमा कार्यक्रमका सभापति प्रेम जिमी याख्याले कार्यक्रममा उपस्थित सबैलाई धन्यवाद दिँदै कार्यक्रम समापन गरेका थिए ।
