शनिवार, कार्तिक १५ गते २०८३
- ट्रेण्डिङ :
- # समाज
- # मनाेरञ्जन
नेकपा (एकीकृत समाजवादी) पार्टीबाट डा। बेदुराम भुसाल नेतृत्वमा सरकारमा सहभागी हुने करिब पक्का भएको छ ।
प्रधानमन्त्री पुष्पकमल दाहाल ‘प्रचण्ड’ ले मन्त्रिपरिषद् विस्तारको तयारी गरिरहेको अवस्थामा सत्तारुढ गठबन्धनमा सहभागी दलहरुमा कुन मन्त्रालयमा दावी गर्ने र कसलाई मन्त्री बनाउने भन्ने चर्चा चलिरहेको छ ।
आन्तरिक रूपमा मन्त्रीबारे लगभग टुंगोमा पुगिसकेकाे एकीकृत समाजवादीबाट सरकारमा भुसालले नेतृत्व गर्ने नेताहरूबीच समझदारी जुटेको छ । राष्ट्रियसभा सदस्य समेत रहेका भुसाल एकीकृत समाजवादीका उपाध्यक्ष हुन् ।
भुसाल यसअघि पार्टीका महासचिव थिए । घनश्याम भुसाललाई महासचिव बनाइएपछि उनलाई उपाध्यक्षमा बढुवा गरिएको थियो । एकीकृत समाजवादीमा सरकारको नेतृत्वका लागि उपाध्यक्ष राजेन्द्र पाण्डे र उपमहासचिव प्रकाश ज्वालाले पनि दाबेदारी प्रस्तुत गरिरहेका छन् ।
उनीहरूलाई अर्कोपटक मन्त्री बनाउने गरी समझादारीको प्रयास गरिएको एक नेताले बताए । एकीकृत समाजवादीले तीन मन्त्रालय पाउनुपर्ने दाबी गरिरहेको छ ।
जसमा बझाङबाट निर्वाचित सांसद भानुभक्त जोशी मन्त्री बन्ने निश्चित रहेको नेताहरू बताउँछन् । एकीकृत समाजवादीभित्र मन्त्री छनोटका लागि मापदण्ड बनाइएको छ ।
स्रोतका अनुसार निर्वाचनअघि शेरबहादुर देउवा नेतृत्वको सरकारमा मन्त्री बनेकामध्येबाट एकजना दोहोरिने गरी मापदण्ड बनाइएको छ । जसमा नेता मेटमणि चौधरी मन्त्रीमा दोहोरिन सक्ने सम्भावना रहेको स्रोतले जनाएको छ । एकीकृत समाजवादीले गृहसहित तीन मन्त्रालयमा दाबी गरिरहेको छ ।
गृह मन्त्रालयमा नेकपा (माओवादी केन्द्र) र नेपाली कांग्रेसको पनि दाबी छ । प्रधानमन्त्री प्रचण्डले गठबन्धनमा आबद्ध दलका नेताहरूसमक्ष आज मन्त्रालय भागबन्डाको औपचारिक प्रस्ताव राख्ने तयारी रहेको उनको सचिवालयले जनाएको छ ।
