शनिवार, कार्तिक १५ गते २०८३
- ट्रेण्डिङ :
- # समाज
- # मनाेरञ्जन
राष्ट्रिय स्वतन्त्र पार्टीले सरकारलाई दिएको समर्थन फिर्ता लिने तयारी गरेको छ । सरकारले आफ्ना नीति तथा कार्यक्रम नसमेटेको भन्दै रास्वपाले गत पुस २६ गते प्रधानमन्त्री पुष्पकमल दाहाल प्रचण्डलाई दिएको समर्थन फिर्ता लिने तयारी गरेको हो ।
रास्वपाका प्रवक्ता मुकुल ढकालले सरकारलाई दिएको समर्थन फिर्ता लिनुपर्ने अवस्थामा पार्टी पुगेको बताए । ‘हाम्रो एजेण्डा सरकारको नीति तथा कार्यक्रममा समेटिएन ।
तसर्थ हामीले सरकारलाई दिएको समर्थन कायम राख्ने औचित्य नै छैन,’ उनले भने, ‘हामीले मेन्टालिटी बनाइसकेका छौं । निर्णय मात्र गर्न बाँकी छ । गत पुस ११ गते उपप्रधानमन्त्रीसहित गृह मन्त्रालयको जिम्मेवारी लिएर रवि लामिछाने सरकारमा गएका थिए ।
तर, नागरिकता विवादमा सर्वोच्च अदालतले विपक्षमा फैसला गरेपछि उनको सांसद पद गुमेको थियो । त्यसपछि उनले आफ्ना दुई मन्त्री र एक राज्यमन्त्रीलाई राजीनामा दिन लगाएका थिए ।
बैशाख १० गते भएको उपनिर्वाचनबाट लामिछाने पुनः प्रतिनिधिसभा सदस्य निर्वाचित भएका छन् । उनी सांसद निर्वाचित भएसँगै सरकारमा जाने अड्कलबाजी हुन थालेका थिए । तर, प्रतिनिधिसभामा उपनिर्वाचनमा निर्वाचित भएकै दिन उनले सरकारलाई दिएको समर्थन कायम राखिरहनुको औचित्य नभएको बताएका थिए ।
