शनिवार, कार्तिक १५ गते २०८३
- ट्रेण्डिङ :
- # समाज
- # मनाेरञ्जन
टीकापुर घटनामा जन्मकैदको सजाय तोकिएका रेशम चौधरी कारागारबाट रिहा भएका छन् ।
गणतन्त्र दिवसको अवसरमा आइतबार राष्ट्रपति रामचन्द्र पौडेलबाट आम माफी पाएपछि उनी आज बिहान कारागारबाट रिहा भएका हुन् । रिहा भएलगत्तै सञ्चारकर्मीसँग संक्षिप्त कुराकानी गर्दै रेशम चौधरीले टीकापुर घटनाको विस्तृत छानबिन हुनुपर्ने बताएका छन्। उनले टीकापुर घटनाको निष्पक्ष र न्यायोचित छानबिन हुनु पर्ने जनाएका छन् ।
उनलाई लिन नागरिक उन्मुक्ति पार्टी अध्यक्ष तथा भूमि व्यवस्था, सहकारी तथा गरिबी निवारणमन्त्री रञ्जिता चौधरी पुगेकी थिइन् । रञ्जिता उनकी पत्नी पनि हुन् । रिहा भएका रेशम चौधरीलाई सिधै घर लैजाने तयारी रहेकाे नागरिक उन्मुक्ति पार्टीले जानकारी दिएको छ ।
६ वर्षपछि जेलबाट निस्किए रेशम चौधरी
टिकापुर हत्या काण्डमा जेल जिवन बिताइरहेका नागरिक उन्मुक्ति पार्टीका संरक्षक रेशम चौधरी छुटेका छन् ।
काठमाडौंस्थित डिल्लीबजार कारागारमा कैद भुक्तान गरिरहेका पूर्वसांसद समेत रहेका चौधरीलाई गणतन्त्र दिवसरको अवसर पारेर राष्ट्रपतिले आम माफी दिएसँगै उनी ६ वर्षपछि आज रिहा भएका हुन् ।
उनको स्वागतका लागि श्रीमती एवं नागरिक उन्मुक्ति पार्टीका अध्यक्ष रञ्जिता चौधरी, नेतृ एलिजा गौतम लगायत नेता कार्यकर्ता, शुभेच्छुक बाजागाजा र फुलमालासहितकारागार पुगेका थिए ।
टीकापुर घटनामा दोषी ठहर भई कैद सजाय भोगिरहेका चौधरीसहित विभिन्न मुद्दाका १९ जना बन्दीलाई राष्ट्रपति रामचन्द्र पौडेलले आइतबार आम माफी दिएका थिए ।
राष्ट्रपतिले थप ४ सय ८२ जना कैदी बन्दीको सजाय पनि मिनाहा गरेका छन् । टीकापुर घटनामा भने रेशमलाई मात्रै माफी दिइएको छ । टीकापुर घटनामा दोषी ठहर भएका रेशमसहित ५ जना हाल कारागारमा छन् ।
रेशम काठमाडौंमा छन् भने प्रदीप चौधरी, हरिनारायण चौधरी र वीरबहादुर चौधरी कैलालीमा कारागारमा र नाबालक श्रवण चौधरी पोखरा सुधार गृहमा छन् ।
