आइतवार, कार्तिक १६ गते २०८३
- ट्रेण्डिङ :
- # समाज
- # मनाेरञ्जन
जुका भन्ने बित्तिकै केही मान्छेलाई निकै डर लाग्छ । जुका १८ इन्च लामो हुन्छ भन्ने सुनेर डर नलाग्ने त को नै होला र ? जुकाहरू विश्वभर नै प्रायः ओसिलो र छिपछिपे पानी हुने ठाउँमा पाइन्छ ।
अधिकांश जुका मान्छेको माइली औँलाभन्दा पनि साना हुन्छन् । केही योभन्दा ठुलो हुन पनि सक्छन् । तर यसको एउटा प्रजाति यति ठुलो हुन्छ कि झट्ट हेर्दा कतिको सातो नै जान सक्छ ।
एमाजनको जंगलमा पाइने यो विशाल जुकाको नाम हेमेन्तेरिया घिलियानी हो । यो ब्राजिल नजिकका केही स्थान र फ्रेन्च गायनामा मात्रै पाइन्छ । त्यसैले तपाईँसम्म यो जुका आउने सम्भावना कम हुन सक्छ । फोटोमै यो जुका देख्दा पनि सिरिङ्ग हुन्छ । अधिकांश जुकाको प्रजाति ३० देखि ३६ सेमीसम्म लामो हुन सक्छन् ।
अपवादका केही प्रजाति ४६ सेमीसम्म पनि लामो हुन सक्छन् । तर हेमेन्तेरिया घिलियानी १८ इन्चसम्म लामो हुनसक्छ । यसलाई पहिलो पटक सन् १८४९ मा इटलीका प्रकृतिविद् भिट्टोरे घिलियानीले फेला पारेका थिए । अनलाइनमा भेटिएका केही जानकारीका अनुसार यो जीवले एक मिनेटमा मानव शरीरबाट ४ देखि १५ मिलिमिटरका दरले रगत चुस्न सक्छ । यो जुकाको सूँड मान्छेको शरीरमा १० सेमीसम्म भित्र पसेर रगत चुस्छ ।
सामान्य जुकाले रगत चुस्दा मुख गाँडेको ठाउँमा चिल्चिलाउन थाल्छ । तर यसको मुखबाट निस्कने केमिकलको ककटेलका कारण घोचेको ठाउँमा लट्ठ हुन्छ । त्यसैले मान्छेहरूले थाहै पाउँदैनन् ।
यो जुका महिनौँसम्म केही नखाईकन पनि बाँच्न सक्छ । रगत चुस्न थालेपछि यी जुकाको शरीरको तौल ३ देखि ६ गुणासम्म बढ्छ ।
