- ट्रेण्डिङ :
सुनसरीको बराहक्षेत्र नगरपालिका–५ मा घोङ्हीको व्यापार गर्दै गर्दा भेटिएका रिता मुखिया घोङ्हीको व्यापारबाट राम्रै आम्दानी गरिरहेकी छिन् । उनले सुनसरीको झुम्का, बराहक्षेत्र, कालाबन्जर लगायतका हतियामा घोङ्हीको व्यापार गर्दै आएकी छिन्।
मुखियाले आफैले खोलाबाट घोङ्ही खोजेर ल्याई हतिया बजारमा व्यापार गर्दै आएको बताइन् । मेहनत अनुसारको राम्रै आम्दानीसँगै सहज पनि भएको उनको भनाइ छ ।
उनले विगत एक वर्षदेखि हटिया बजारमा घोङ्हीको व्यापार गर्दै आएकी छिन् । उनका लागि भने अहिले सुनसरीका झुम्का, कालाबन्जरका हटियाबजार भने घोङ्हीको व्यापार गर्ने थलो नै बनेका छन् ।
उनले घोङ्ही जताततै नपाउने भएकाले खोलाबाट खोजेर घरमा ल्याएपछि परिवारसहित मिलेर घोङ्हीलाई पखालेर सफा बनाएपछि स्थानीय हाटबजारमा बिक्री गर्ने गरेको बताइन् । घोङ्हीको व्यापारबाट उनले मासिक २५ देखि ३० हजारसम्म रुपैयाँ आम्दानी हुँदै आएको जानकारी दिइन् ।
आफूले खोलाबाट खोजेर ल्याई बिक्री गर्दै आएको घोङ्ही किन्न भने बराह क्षेत्र नगरपालिकालगायत झुम्का कालाबन्जरका ठाउँबाट किन्न आउने ग्राहकको घुइँचो नै लाग्ने गरेको उनी सुनाउँछिन् । उनले घोङ्ही प्रतिकिलो एक सय रुपैयाँमा बिक्री गर्दै आएकी छिन् ।
उनले दैनिक रुपमा १२ देखि १५ किलोसम्म बिक्री गर्दै आएकी छिन् । उनले यहीँबाट परिवारका लागि खर्चसमेत जुटाउँदै आएको बताइन् ।
उनले भनिन्, ‘घोङ्हीमा भिटामिन पाइने हुनाले रुघा र चिसो लागेको बेला यसलाई सफा पानीले धोएर पकाएर रस पिउँदा स्वादिलो हुनका साथ रुघा र चिसो पनि ठिक हुने भएकाले धेरैजसो मानिसले घोङ्ही खाने गरेका छन् ।’ गर्मी महिनाभन्दा जाडोमा घोङ्हीको व्यापार राम्रो हुने गरेको मुखियाले बताइन् ।
जाडो महिनामा घोङ्ही बाहिर निस्किने भएकाले पुसको सुरुवातदेखि माघ–फागुनसम्म राम्रो व्यापार हुने गरेको उनको बुझाइ छ ।
