शनिवार, कार्तिक १५ गते २०८३
- ट्रेण्डिङ :
- # समाज
- # मनाेरञ्जन
इजरायल र हमासबिच गाजामा युद्धविराम र इजरायली बन्धकहरूको रिहाइका लागि भएको सम्झौताका सर्तहरू अन्तिम चरणमा पुगेको छ। यस युद्धविरामका लागि जारी वार्ताको अनुगमन गरिरहेका प्यालेस्टिनी अधिकारीले बीबीसीलाई यो जानकारी दिएका हुन् ।
यो खबर यस्तो बेला आएको हो जब अमेरिकी राष्ट्रपति जो बाइडेनले सम्झौता अन्तिम चरणमा पुगेको र उनको प्रशासनले यस विषयमा लगनशीलताका साथ काम गरिरहेको बताएका छन् । अमेरिकी राष्ट्रपति जो बाइडेनले आइतबार इजरायली प्रधानमन्त्री बेन्जामिन नेतान्याहु र सोमबार वार्ताको मध्यस्थता गरिरहेका कतारका शेख तमिम बिन हमाद अल थानीसँग कुरा गरेका थिए।
एक इजरायली अधिकारीले पनि समाचार एजेन्सी रोयटर्सलाई वार्ता ‘अन्तिम चरण’ मा रहेको र ‘केही घण्टा वा दिनमा’ सहमति हुन सक्ने जानकारी दिए ।
एक प्यालेस्टिनी अधिकारीका अनुसार हमास र इजरायली अधिकारीहरू सोमबार एउटा भवनमा वार्ता गरिरहेका थिए। यस सम्झौतासँग सम्बन्धित केही सम्भावनाबारे जानकारी दिँदै अधिकारीले भने, ‘यस विषयमा विस्तृत प्राविधिक विषयमा छलफल गर्न धेरै समय लागेको हो ।’
सम्झौताका सर्तहरू :
हमासले सम्झौताको पहिलो दिन तीन जना बन्धकहरूलाई रिहा गर्न र त्यसपछि इजरायलले जनसंख्या भएको क्षेत्रबाट आफ्ना सेना फिर्ता गर्न थाल्ने विषयमा दुवै पक्ष सहमत भएका छन् ।
सात दिन पछि, हमासले थप चार जना बन्धकहरूलाई रिहा गर्नेछ र इजरायलले दक्षिणबाट विस्थापित मानिसहरूलाई उत्तरमा फर्कन अनुमति दिनेछ, तर तटीय सडकहरूबाट पैदल यात्रा गरेर मात्र।
कारहरू, जनावरहरूले तानेका गाडाहरू र ट्रकहरू सालाह अल-दिन रोडको साथ सडक पार गर्न अनुमति दिइनेछ। कतार र इजिप्टको प्राविधिक सुरक्षा टोलीद्वारा सञ्चालित एक्स–रे मेसिनबाट यसको अनुगमन हुनेछ ।
युद्धविराम सम्झौतामा इजरायली सेनाहरू फिलाडेल्फिया कोरिडोरमा रहनेछ र ४२ दिनको पहिलो चरणमा पूर्वी र उत्तरी सिमानामा ८ सय मिटरको बफर जोन कायम राख्ने प्रावधान समावेश गरिएको छ।
यस सम्झौता अन्तर्गत इजरायलले १५ वर्ष वा सोभन्दा बढी समयदेखि सजाय भुक्तान गरिरहेका करिब १९० जनासहित एक हजार प्यालेस्टिनी बन्दीलाई रिहा गर्न पनि सहमत भएको छ । बदलामा, हमासले ३४ बन्धकहरूलाई रिहा गर्नेछ।
यस युद्धविराम सम्झौताको दोस्रो र तेस्रो चरणको वार्ता पहिलो चरणको १६ औँ दिनबाट सुरु हुनेछ।
