- ट्रेण्डिङ :
क्यानडाको प्रधानमन्त्री बन्ने दौडमा भारतीय मूलकी रुबी ढल्लाको नाम पनि परेको छ । रुबी टोरन्टो क्षेत्रकी पूर्व लिबरल सांसद र प्रेरक वक्ता पनि हुन्।उनले प्रारम्भिक दिनमा मोडलको रूपमा पनि काम गरेकी थिइन् ।
जस्टिन ट्रुडोले लिबरल पार्टीको नेताबाट राजीनामा दिएपछि पार्टी अब नयाँ नेताको खोजीमा छ । भारतीय मूलकी अनिता आनन्द नयाँ नेता बन्ने दौडमा सामेल भए पनि उनले त्यसबाट आफ्नो नाम फिर्ता लिने घोषणा गरेकी छन् । रुबी ढिलो गरी दौडमा सामेल भए पनि उनको नाम अहिले चर्चाको विषय बनेको छ । रुबीले सन् २००४ देखि २०११ सम्म टोरन्टो क्षेत्रको सिट सम्हालेकी थिइन् ।
उनी हाउस अफ कमन्समा निर्वाचित भारतीय मूलकी पहिलो क्यानेडियन महिला बनेकी थिइन्। उनीसँगै कन्जरभेटिभ पार्टीबाट नीना ग्रेवाल पनि सांसदमा निर्वाचित भएकी थिइन् । हालै सीबीसीलाई दिएको अन्तर्वार्तामा उनले आफू अहिलेसम्म तीन पटक सांसद बनेको र लामो समयदेखि राजनीतिबाट टाढा रहेको बताएकी थिइन् । उनी होटल व्यवसायी पनि हुन् ।
उनले प्रारम्भिक दिनमा मोडलको रूपमा पनि काम गरेको बताइन् । रुबीले समाचार संस्था सीपी२४ सँग कुराकानी गर्दै आफ्नो आगमनले प्रधानमन्त्रीको दौडमा विविधता ल्याएको बताइन् ।
रुबीमाथि परिवारले काम गर्ने दुई घरेलु कामदारलाई दुर्व्यवहार गरेको आरोप लागेको थियो । जसका कारण उनले सन् २००९ मा आफ्नो पदबाट राजीनामा दिएकी थिइन् । तर, ढल्लाले आफूले कुनै गल्ती नगरेको बारम्बार अस्वीकार गर्दै आएकी छन् । उनीबाहेक अरू धेरै नेताहरू प्रधानमन्त्रीको दौडमा सामेल छन् ।
