एजेन्सी । जातीय विभेदका कारण एक चिकित्सकले आत्महत्या गरेका छन् । भारतको जबलपुर मेडिकल कलेजमा अध्ययनरत २८ वर्षीय डा.भागवत देवांगनले जातीय विभेदकै कारण आत्महत्या गरेका छन् ।
भारतको छत्तिसगढका ती जुनियर डा.भागवतले आफ्ना सिनियरबाट चरम विभेदको सामना गर्दै आएका थिए । विभेदकै कारण उनले आत्महत्या गरेको भन्दै छत्तिसगढमा विशाल प्रदर्शन भएको बिबिसीले जनाएको छ । तल्लो जातको भन्दै हेपाह व्यवहार र प्रताडित गर्ने गरेकाले उनले १० दिनअघि मेडिकल कलेजमै आत्महत्या गरेका थिए ।
आफन्तले सिनियर डाक्टरलाई कारबाहीको माग गरेका छन् । तर, कलेज व्यवस्थापनले भने आरोप अस्वीकार गरेको छ । आफन्तले सिनियर ५ जना डाक्टरविरुद्ध कारबाहीका लागि उजुरी दिए पनि पुलिसले अनुसन्धानसमेत नगरेको आफन्तको भनाइ छ । डा.भागवतले त्यहाँ पिजी गरिरहेका थिए ।
उनका दाजु प्रल्हाद देवांगनले भाइले आफूलाई उच्च जातका सिनियर डाक्टरहरुले कुटपिटसमेत गरेको बताएको जानकारी दिएका छन् । यो विषयमा पटक पटक कलेज प्रशासनलाई जानकारी गराइएको र त्यहीँ पीडाले आफूले भाइ गुमाउनु परेको प्रल्हादको भनाइ छ । भारतमा यो घटनापछि जातीय विभेदका विषयमा नयाँ बहस सुरु भएको छ ।
