- ट्रेण्डिङ :
कोभिड–१९ संक्रमणको जोखिमका कारण दसैँ लक्षित नयाँ नोट सटही नगर्ने निर्णय भएको नेपाल राष्ट्र बैंकले जनाएको छ ।
राष्ट्र बैंकका प्रवक्ता डा. गुणाकर भट्टले दसैँमा नयाँ नोट सटहीको व्यवस्था गर्दा लामो लाइन बस्ने र भीड हुने तथा संक्रमणको जोखिम झनै बढ्ने भएकाले यसपटकको दसैँ लक्षित नयाँ नोट सटही नगर्ने निर्णय भएको बताए ।
यस्तै अन्य बैंकहरुमा समेत संक्रमणको जोखिम उच्च भएकोले दसैँका लागि लक्षित गरी नयाँ नोट सटहीको व्यवस्था कुनैपनि बैंकमा नगरिएको उनले बताए । तर, आफ्नो खातामा भएको रकम बैंकबाट निकाल्दा केही सुकिला र नयाँ नोट पाउन सक्ने अवस्था भने रहेको प्रवक्ता भट्टले बताए ।
यसअघिका वर्षहरुमा दसैँमा लामो लाइन बसेर नयाँ नोटको सटही गर्ने व्यवस्था राष्ट्र बैंकले मिलाउँदै आएको थियो । जुन एक किसिमले प्रचलनको रुपमा पनि स्थापित भइसकेको छ ।
राष्ट्र बैंकले ५ रुपैयाँ, १० रुपैयाँ, २० रुपैयाँ, ५० रुपैयाँ र १ सय रुपैयाँ दरका नयाँ नोटहरु दसैँको बेलामा सटही गर्दै आएको थियो । यस वर्ष भने राष्ट्र बैंकसँग नयाँ नोट मौज्दात भएपनि कोभिड संक्रमणको जोखिमका कारण नोट सटही असम्भव भएको हो ।
