- ट्रेण्डिङ :
रुस–युक्रेन युद्धका क्रममा जुलाई महिना युक्रेनका लागि सन् २०२२ को अप्रिलपछिकै सबैभन्दा घातक बनेको छ।
युक्रेनी सरकारी तथ्याङ्कअनुसार यस महिनामा मात्र रुसी आक्रमणमा परी कम्तीमा ३७७ सर्वसाधारणको मृत्यु भएको छ भने २ हजार १२९ जना घाइते भएका छन्। यससँगै जुलाई चार वर्षयताकै सबैभन्दा बढी नागरिक हताहत भएको महिना बनेको छ।
पछिल्ला साताहरूमा रुसले विशेषगरी ब्यालिस्टिक मिसाइल, ड्रोन र निर्देशित हवाई बमको प्रयोग तीव्र बनाएको छ। युक्रेनी राजधानी किभसहित विभिन्न सहरलाई लक्षित गर्दै भएका आक्रमणका कारण नागरिक क्षति उल्लेख्य रूपमा बढेको अधिकारीहरूले बताएका छन्। युक्रेनी राष्ट्रपति भोलोदिमिर जेलेन्स्कीका अनुसार पछिल्लो एक सातामा मात्र रुसले करिब १ हजार ७ सय ड्रोन, १ हजार ६ सय ३० भन्दा बढी निर्देशित हवाई बम र ५० भन्दा बढी ब्यालिस्टिक मिसाइल प्रहार गरेको छ।
जेलेन्स्कीले युक्रेनलाई थप हवाई प्रतिरक्षा प्रणाली उपलब्ध गराउन अन्तर्राष्ट्रिय साझेदारहरूसँग पुनः आग्रह गरेका छन्। उनले विशेषगरी प्याट्रियट जस्ता मिसाइल प्रतिरक्षा प्रणाली तत्काल आवश्यक रहेको उल्लेख गर्दै भनेका छन्, ‘साझेदार राष्ट्रका गोदाममा रहेका प्रत्येक अवरोधक मिसाइलभन्दा युक्रेनको आकाशमा तिनको उपस्थिति नै नागरिकको जीवन बचाउने माध्यम हो।’
आइतबार उत्तरी युक्रेनको चेर्निहिभ क्षेत्रमा रहेको एक सुपरमार्केटमा भएको रुसी ड्रोन आक्रमणमा १० वर्षीय बालक र एक वयस्कको मृत्यु भएको छ भने अन्य तीन जना घाइते भएका छन्।
यसैबीच युक्रेनले पनि रुसी ऊर्जा पूर्वाधारमाथिको ड्रोन र मिसाइल आक्रमणलाई निरन्तरता दिएको छ। पछिल्लो समय रुसका विभिन्न तेल प्रशोधन केन्द्रहरू निशानामा परेका छन्। यी आक्रमणपछि रुसले डिजेल निर्यातमाथिको प्रतिबन्ध वर्षको अन्त्यसम्म लम्ब्याएको छ। जवाफस्वरूप रुसले उत्तरी युक्रेनका इन्धन भण्डारण केन्द्र, कालो सागर तथा ड्यान्युब नदी क्षेत्रका बन्दरगाहहरूमा आक्रमण तीव्र पारेको छ।
यता लगातार तेस्रो दिन रोमानियाली वायुसेनाले कालो सागरमाथि उडिरहेको एक रुसी ड्रोन खसालेको जनाएको छ। रोमानियाका राष्ट्रपति निकुसोर डानले रुसी ड्रोनले आफ्नो देशको हवाई क्षेत्र उल्लङ्घन गर्नु ‘अस्वीकार्य र असहनीय’ भएको प्रतिक्रिया दिएका छन्। उक्त घटनापछि बुखारेस्टस्थित रुसी राजदूतलाई रोमानियाको विदेश मन्त्रालयमा स्पष्टीकरणका लागि बोलाइएको छ।
