- ट्रेण्डिङ :
मंगलबार नेकपा स्थायी कमिटि बैठकमा विवाद चुलिएका बेला निर्वाचन आयोगमा नेकपा एमाले दर्ता गर्न निवेदन दर्ता भएको समाचारले राजनीतिमा तरंग पैदा गरेको छ । नेकपा एमाले दर्ताका लागि निर्वाचन आयोगमा परेको निवेदनमा २१ जना पदाधिकारी रहेका छन् । आईतबार उदाउदै गरेको सुर्य चुनाव चिन्ह राखेर निवेदन दर्ता भएको निर्वाचन आयोगले मंगलबार सार्वजनिक गरेको थियो ।
निवेदनमा दलको पुरा नाम ‘नेपाल कम्युनिस्ट पार्टी एकिकृत माक्र्सवादी लेनिनवादी’ राखिएको छ ।
निर्वाचन आयोगका प्रवक्ता राजकुमार श्रेष्ठका अनुसारआवेदनमा दलको नाम, कार्यसमितिकोे पदाधिकारीहरुको नाम, विधान, घोषणापत्र, विनियमावलीलगायतका कागजातहरु, झण्डा, चिह्न पनि पेश भइसकेको छ । साथै दलमा आवद्ध हुन आवश्यक पर्ने पाँच सयजना व्यक्तिहरुको हस्ताक्षरसहितको प्रतिबद्धता पनि पेश भइसकेको श्रेष्ठले बताए ।
अध्ययनको क्रममा केही आवश्यक कागजपत्र छुटेको भए सम्बन्धित व्यक्तिहरूसँग माग गरिने श्रेष्ठको भनाइ छ । उनी भन्छन्, ‘यहाँ आएका कागजात अध्ययन गर्दै छौँ । कार्यसमितिमा रहेका पदाधिकारीहरूको विवरण भेरिफिकेसन गर्ने काम हुन्छ,’ उनले भने, ‘दलको विधानमा उल्लेख भएका प्रावधानहरू नेपालको संविधान, कानुनबमोजिम भए–नभएको अध्ययन गरिन्छ । कुनै संशोधन गर्नुपर्ने वा ऐन–कानुनसँग बाझिएको कुरा छन् भने त्यसलाई मिलाउन लगाउने र ती सबै प्रक्रिया पूरा गरेपछि दल दर्ताको प्रक्रिया अघि बढ्छ । यो सबै प्रक्रिया पूरा गर्न ४५ दिनको समय उपलब्ध हुन्छ । ४५ दिनभित्र कागजातको भेरिफिकेसन गर्नेलगायत उहाँहरूले कागजातसमेत बुझाउनुपर्छ ।’
नेकपा एमाले र माओवादीको पार्टी एकता भएको वर्ष दिन नाघिसकेकाले नेकपा एमाले नामक दल दर्ता गराउन बाटो खुलेको हो ।
नेकपा एमाले नामक दल दर्ताका लागि आवेदन परेको विषयले नेकपाको मंगलबार बसेको स्थायी समिति बैठकमा चर्चा पाएको थियो ।
उक्त पार्टी दर्ताका लागि निवदेन पर्नुमा पार्टी अध्यक्ष तथा प्रधानमन्त्री केपी शर्मा ओलीकै हात रहेको आरोप उपाध्यक्ष वामदेव गौतमले लगाएका थिए ।
दल दर्ताका लागी निवेदन दिने २१ जनाको नाम निम्नअनुसार छ ।
सन्ध्या तिवारी अध्यक्ष
भगवती खड्का उपाध्यक्ष
मनिष कुमार उपाध्या महासचिव
अस्मिता सुनार, सचिब
दाबा लामा, सचिब
जयराम राउत, सचिब
खगेन्द्र प्रसाद भुषाल, सचिब
राधा पुरी, सचिब ।
हरी बहादुर बोहोरा, सचिब
तारदेवी शाही सचिव
पवन विष्ट सदस्य
निलम पोखरेल
किरण लामिछाने ।
उमेश महतो
उषा कुमारी झा
प्रदिपराज गिरी
पूर्णिमा तामाग
निश्चल बस्नेत
सञ्जिब विष्ट
बिनिता कार्की
बिमला विष्ट रोका
