भारतीय सेनाध्यक्ष जनरल मनोज मुकुन्द नरावणे,कात्तिक १९ गते नेपाल भ्रमणमा

आश बहादुर गुरुङ्ग

कार्तिक ११, २०७७ मंगलवार • ०८:४६:२९ बजे

1.6K

भारतीय सेनाध्यक्ष जनरल मनोज मुकुन्द नरावणे,कात्तिक १९ गते नेपाल भ्रमणमा

भारतीय सेनाध्यक्ष जनरल मनोज मुकुन्द नरावणेको नेपाल भ्रमण मिति सार्वजनिक भएको छ । भारतीय सरकारी समाचार संस्था पीटिआईका अनुसार नारावणे कात्तिक १९ गतेदेखि २१ गतेसम्म नेपाल भ्रमणमा रहनेछन् ।

पीटिआईलाई उद्धृत गर्दै इकोनोमिक टाइम्सले भारतीय सेनाध्यक्षको नेपाल भ्रमणको मिति टुंगो लागेको खबर सार्वजनिक गरेको हो ।

विश्वव्यापी महामारीको रुपमा फैलिएको कोरोना भाइरस संक्रमण नियन्त्रणका लागि भएका लकडाउन र निषेधाज्ञाका कारण सेनाध्यक्ष नरावणेको नेपाल भ्रमण यसअघि स्थगित भएको थियो ।

भ्रमणका क्रममा नरावणेले राष्ट्रपति विद्यादेवी भण्डारीबाट नेपाली सेनाको मानार्थ महारथी दर्जा ग्रहण गर्नेछन् । यसलाई नेपाल र भारतको सम्बन्धमा नियमित प्रक्रिया मानिन्छ ।

नेपालका सेनापतिले समेत भारतका राष्ट्रपतिबाट मानार्थ सेनाध्यक्षको दर्जा ग्रहण गर्दै आएका छन् । यो सन् १९५० देखि चल्दै आएको परम्परा हो ।

सीमा विवादको विषयमा नेपाल र भारतको सम्बन्ध चिसिएका बेला हुन लागेको सेनाध्यक्षको भ्रमणलाई महत्वका साथ हेरिएको छ । उनको भ्रमणले दुई देशको सीमा विवादमा कूटनीतिक वार्ताको बाटो खुल्ने अपेक्षा गरिएको छ ।

नेपाली भूभाग लिम्पियाधुरा, लिपुलेक र कालापानीमाथि भारतीय दाबी निरन्तर रहनु र नेपालले यो भूभाग समेटेर नक्सा सार्वजनिक गरेपछि नेपाल र भारतको सम्बन्ध चिसिएको छ । भारतीय सेना प्रमुखको भ्रमण सीमा विवाद समाधानका लागि महत्वपूर्ण पहल हुनसक्ने कूटनीतिज्ञले बताउँदै आएका छन् ।

नेपाल सरकारले २०७६ माघ २० गते नै सेनाध्यक्ष नरावणेको भ्रमणको निर्णय गरेको थियो । उनी आउने चर्चा भए पनि लकडाउनका कारण उनको भ्रमण रोकिएको दुवै पक्षले बताउँदै आएका थिए ।