शनिवार, कार्तिक १५ गते २०८३
- ट्रेण्डिङ :
- # समाज
- # मनाेरञ्जन
नेपाली कांग्रेसले आफ्ना केन्द्रीय सदस्य मीन विश्वकर्माको उपचारमा ध्यान दिन सरकारलाई आग्रह गरेको छ। कोरोना भाइरस संक्रमित विश्वकर्मा हाल ग्राण्डी अस्पतालमा उपचाररत छन्।
प्रतिनिधि सभा सदस्यसमेत रहेका विश्वकर्माको उपचारमा सरकारले विशेष ध्यान दिन कांग्रेसका प्रमुख सचेतक बालकृष्ण खाँणले प्रधानमन्त्री केपी शर्मा ओली र स्वास्थ्य मन्त्री भानुभक्त ढकाललाई टेलिफोन गरी आग्रह गरेका हुन्।
‘प्रधानमन्त्री र स्वास्थ्यमन्त्रीलाई टेलिफोन गरेर मैले माननीय मीन विश्वकर्माको उपचारमा ध्यान दिन आग्रह गरें,’ खाँणले भने, ‘उहाँहरूले सकरात्मक जवाफ दिनु भएको छ।’
कोरोना भाइरसको संक्रमणसँगै फोक्सोको निमोनिया र श्वासप्रश्वासको समस्याले ग्रस्त विश्वकर्मालाई ग्राण्डी अस्पतालको भेन्टिलेटरमा राखेर उपचार गराइएको खाँणले जानकारी दिएका छन्।
कांग्रेस नेता विश्वकर्मालाई गत कात्तिक १ गते कोरोना भाइरस संक्रमण पुष्टि भएको थियो। होम आइसोलेसनमा बसेका विश्वकर्माको स्वास्थ्यमा समस्या देखिएपछि पाँच दिनयता अस्पतालमै राखेर उपचार भइरहेको छ।
