नेपाल कम्युनिष्ट पार्टी (नेकपा)को सचिवालयको अनौपचारिक बैठकले पार्टी एकतालाई जोगाएर अगाडि बढ्ने निर्णय गरेको छ । पार्टी कार्यालय धुम्बाराहीमा बसेको सचिवालय बैठकले भोलि सचिवालयका बहुसंख्यक सदस्यले सामूहिकरुपमै अर्का अध्यक्ष केपी शर्मा अोलीलाई भेटेर औपचारिक बैठकका लागि पहल गर्ने निर्णय गरेको प्रवक्ता नारायणकाजी श्रेष्ठ ‘प्रकाश’ले जानकारी दिए । प्रधानमन्त्रीसमेत रहेका अध्यक्ष केपी शर्मा ओलीकै सहमतिमा बसेको सचिवालयको अनौपचारिक बैठकले स्थायी कमिटी बैठकका निर्णय कार्यान्वयन हुनुपर्नेमा जोड दिएको छ ।
विधान अनुसार माग गरिएका बैठक तत्काल बोलाउन पहल गर्ने निर्णय पनि भएको छ । पार्टी बैठकका लागि भोलि अध्यक्ष प्रचण्डसहित वरिष्ठ नेताद्वय झलनाथ खनाल र माधव कुमार नेपाल, उपाध्यक्ष बामदेव गौतम र प्रवक्ता श्रेष्ठ प्रधानमन्त्री ओलीलाई भेट्न बालुवाटार जाने भएका छन् । कार्यकारी अध्यक्षले पार्टीको आधिकारिक बैठक बोलाउन मिल्ने भए पनि पार्टी एकताको सन्दर्भलाई ध्यान दिँदै अर्का अध्यक्ष ओलीको सहमतिमै बैठक बोलाउन पहल गर्ने निर्णय भएको श्रेष्ठको भनाइ छ ।
पछिल्लो समय बैठकको निरन्तर माग गरिए पनि ओलीले आफूले बैठक पनि नबोलाउने र बैठकको निर्णय पनि कार्यान्वयन नगर्ने बताउँदै आएका छन् । पार्टीका सबै तहमा अल्पमतमा परेपछि उनले बैठक टार्दै आइरहेका छन् ।
आजको बैठकमा प्रचण्डले औपचारिक बैठक राखेमा पार्टी त्यहीँबाट विभाजन गर्ने ओलीले चेतावनी दिएको पनि सचिवालय सदस्यलाई जानकारी गराएका थिए । प्रधानमन्त्री ओलीको निर्देशन अनुसार आजको बैठकमा ओलीसहित महासचिव विष्णु पौडेल, सचिवालय सदस्यद्वय ईश्वर पोखरेल र रामबहादुर थापा बादल सहभागी भएनन् ।
