शनिवार, कार्तिक १५ गते २०८३
- ट्रेण्डिङ :
- # समाज
- # मनाेरञ्जन
नेकपा भित्रको विवाद उत्कर्षमा पुगेका बेला फेरि एक पटक प्रधानमन्त्रीसमेत रहेका नेकपा अध्यक्ष केपी शर्मा ओलीले पूर्वमाओवादी नेतासँग परामर्स तीव्र पारेका छन् । नेकपा वरिष्ठ नेता माधव कुमार नेपाल र उपाध्यक्ष बामदेव गौतमलाई आफू निकट ल्याउने प्रयास असफल भएपछि ओलीले पूर्वमाओवादी नेताहरुसँग निरन्तर छलफल गरिरहेको बालुवाटार स्रोतले जनाएको छ ।
नेकपा स्थायी कमिटी सदस्य देवेन्द्र पौडेलले आफूहरुले प्रधानमन्त्री ओलीलाई भेटेर पार्टी एकता कायम गर्न र पार्टी बैठकका निर्णय कार्यान्वयन गरेर जान सुझाव दिएको जानकारी दिए । उनले आफूहरुले पार्टी विभाजनबाट रोक्नका आग्रह गरेको पनि बताएका छन् । पूर्वमाओवादी नेताहरुसँग ओलीले आफूलाई सहयोग गर्नका लागि आग्रह गरेका छन् ।
पार्टीको सचिवालय बैठकमा बहुमत सदस्यको तर्फबाट कार्यकारी अध्यक्ष पुष्पकमल दाहाल ‘प्रचण्ड’ले ओलीविरुद्ध संगीन आरोपसहित राजनीतिक प्रस्ताव पेश गरेपछि ओली समस्यामा छन् । उनले यो विषयमा राष्ट्रपति विद्यादेवी भण्डारीसँग पनि छलफल गरेका छन् ।
स्रोतका अनुसार भण्डारीले अध्यादेश वा अन्य विकल्पमा जानुभन्दा संसदीय दलमा बहुमत जुटाउन सल्लाह दिएपछि ओलीले गौतम र नेपालसँग सल्लाह गरेका थिए । तर दुबैजनाले पार्टी बैठकबाट निर्णयमा पुग्न आग्रह गरेपछि पूर्वमाओवादीका मध्यमार्गी नेतालाई आफू निकट ल्याउने प्रयासमा ओली लागेका छन् ।
संसदीय दलमा बहुमत जुटाउन भन्दै ओलीको तर्फबाट महासचिव विष्णु पौडेल, सचिवालय सदस्य ईश्वर पोखरेल, स्थायी कमिटी सदस्यद्वय सुवास नेम्बाङ र पृथ्वीसुब्बा गुरुङ सक्रिय भएका छन् । संसदीय दलमा ओली बहुमतमा छैनन् । पार्टीका सबै कमिटीमा अहिलेसम्म ओली अल्पमतमा छन् ।
पौडेलसहित टोपबहादुर रायमाझी, प्रभू साह, लेखराज भट्ट, मणि थापालगायतका नेताहरुसँग ओली निरन्तर छलफलमा छन् । सचिवालय सदस्य रामबहादुर थापा बादलले अन्तिमसम्म पनि आफूलाई साथ दिनेमा ओली आशावादी छन् ।
भोलिको सचिवालय बैठकसम्म ओलीले प्रचण्डको प्रस्ताव फिर्ता लिन लगाउन नसकेमा वा अन्य कुनै विकल्पमा जान नसकेमा महासचिव पौडेलमार्फत एकतर्फी बैठक स्थगित गरेको सूचना जारी गर्न लगाउने तयारी छ । तर, प्रचण्डसहितका बहुमत सदस्यले अब बहुमतका आधारमा निर्णय गरेर अगाडि बढ्ने एक नेताले बताएका छन् ।
