एजेन्सी । इरानले आफ्ना वरिष्ठ परमाणु वैज्ञानिक मोहसिन फखरीजादेहको हत्यामा इजरायल र निर्वासित
विपक्षी समुहको हात रहेको आरोप लगाएको छ ।फखरीजादेहलाई शुक्रबार हत्या गर्न रिमोट नियन्त्रित हतियारको प्रयोग गरेको पनि इरानी दावी छ । तेहरानमा फखरिजादेहको अन्त्येष्टिका क्रममा ईरानी सुरक्षा प्रमुख अली शामखानीले आक्रमणकारीले विद्युतीय उपकरणको प्रयोग गरेको बताएका हुन ।
उनका अनुसार आक्रमणकारीहरु घटनास्थलमा नहुनु नै उनीहरुले रिमोट नियन्त्रित विद्युतीय हतियारको प्रयोग गरेको प्रमाण हो । शामखानीले यस बारे अझै विस्तृतमा भने केही बताएनन् । ईरानी रक्षा मन्त्रालयले शुरुमा फखरीजादेहको कारलाई बन्दुकधारीहरुले निशाना बनाएर हत्या गरेको बताएको थियो । तर पछिल्लो समय सुरक्षा प्रमुख शामखानीले नयाँ तर संक्षिप्त सूचनासहितको यस्तो खुलासा गरेका हुन ।
ईरानी पक्षबाट लगाइएको यो आरोपका बारेमा इज्ररायलले अहिलेसम्म कुनै प्रतिकृया दिएको छैन । सन २००० को दशकदेखि नै मोहसिन फखरीजादेहले ईरानको परमाणु कार्यक्रममा महत्वपूर्ण भूमिका निर्वाह गर्दै आएको बिबिसीले जनाएको छ ।
