नेपाल कम्युनिष्ट पार्टी (नेकपा) मा नेताहरुबीचमा भएको विवाद समाधानका लागि भइरहेको प्रस्तावमाथि प्रस्तावको दोहोरीमा स्थायी समिति सदस्य जनार्दन शर्मा ‘प्रभाकर’ पनि थपिएका छन् । आजबाट शुरु भएको नेकपाको स्थायी कमिटी बैठकमा उनले दुबै अध्यक्षलाई सम्बोधन गर्दै एक पन्नाको ‘विशेष प्रस्ताव’ पेश गरेका छन् ।

नेकपामा सचिवालय बैठक आव्हानका लागि कार्यकारी अध्यक्ष पुष्पकमल दाहाल ‘प्रचण्ड’सहितका पाँच जना सचिवालय सदस्यहरुले अध्यक्ष केपी शर्मा ओलीलाई पहिलो पत्र लेखिएको थियो । सोको जवाफमा प्रधानमन्त्री ओलीले १० पृष्ठ लामो जवाफ पठाएका थिए । उक्त १० पृष्ठ लामो पत्रको कार्यकारी अध्यक्ष प्रचण्डले ७ पृष्ठमा प्रत्यूत्तर दिएका थिए । साथै, उनले १९ पृष्ठको प्रस्ताव सचिवालय बैठकमा पेश गरेका थिए । उनको उक्त प्रस्तावको फेरी अध्यक्ष ओलीले ३८ पृष्ठ लामो अर्का प्रस्ताव पेश गरे ।

यसरी एकपछि अर्को पत्र र प्रस्तावको दोहोरीमा नेता शर्माको पनि एक पृष्ठको प्रस्ताव आजको स्थायी समिति बैठकबाट थपिएको छ । उनले आफ्नो प्रस्तावमा नेकपाको सरकार र गृह प्रशासनले संघीयता विरोधी कृयाकलापको रक्षा गरिरहेको छ भन्ने जनआवाज सुनिन थालेको भन्दै संघीयताको पक्षधर सबै पार्टीहरुको बीचमा छलफल आयोजना गरी जनभावना अनुसार अघि बढ्नुपर्नेमा जोड दिएका छन् ।

उनले दुबै अध्यक्षहरुको प्रस्ताव र पार्टीमा उत्पन्न विवादमा नछोइ कोभिड महामारीबारे तत्काल भ्याक्सिन ल्याइ कोरोना भाइरसबाट जनताको जीवन रक्षा गर्नका साथै पूर्णरुपले आर्थिक गतिबिधिहरु सुचारु हुने अवस्था श्रृजना गर्नुपर्नेमा पनि जोड दिएका छन् ।

हेर्नुहोस् स्थायी समिति सदस्य शर्माको विशेष प्रस्तावको पूर्णपाठः–

क.अध्यक्षद्वय, 
नेपाल कम्युनिस्ट पार्टी(नेकपा) ।

                विषय : बिशेष प्रस्तावमा तत्काल छलफल गर्ने बारे । 

नेपाल कम्युनिस्ट पार्टी(नेकपा) संघिय लोकतान्त्रिक गणतन्त्रको संवाहक र संरक्षक समेत हो भन्ने कुरामा कुनै दुबिधा छैन । यस विचमा सरकारले संघिय लोकतान्त्रिक गणतन्त्र नेपालको नाम बदलेर नेपाल मात्र राख्ने निर्णय बाट उत्साहित गणतन्त्र विरोधिहरु आज खुलेआम संघिय लोकतान्त्रिक गणतन्त्रका विरुद्ध उत्रिएका छन । नेकपाको सरकार र गृह प्रशासन यस्ता कृयाकलापको रक्षा गरिरहेको छ भन्ने जन आवाज सुन्निन थालेको छ । बरु गणतन्त्र लोकतन्त्रका पक्षमा लडेका नेताहरुमा दमन गर्ने र गणतन्त्र विरोधी प्रति नरम व्यवहार गरेको भन्ने जनताको आरोप छ । यसबाट नेपाली जनतामा ठुलो असन्तुटि पैदा हँुदै जाने सन्र्दभमा नेकपाको स्थायी कमिटि बैठक संघिय लोकतान्त्रिक गणतन्त्रको रक्षा गर्न कुनै कसर बाँकी नराख्ने प्रतिवद्धता सहित दृढ संकल्प गरौ । जनताको आवाज नसुन्दा त्यसले गम्भीर परिणाम निम्त्याउने बारे हाम्रो नेतृत्व स्पष्ट नै छ । तसर्थ संघियताको पक्ष्यधर सबै पार्टीहरुको विचमा छलफल आयोजना गरी जनभावना अनुसार सरकारका कमि कमजोरीहरु सच्चाउँदै जनतामा देखिएको असन्तुटि लाई संबोधन गर्न अव ढिला गर्नु हुदैन । 
मुख्य गरी कोभिड महामारी बारे तत्काल भ्याक्सिन ल्याइ कोरोणा भाइरस बाट जनताको जीवन रक्षा गर्नका साथै पूर्णरुपले आर्थिक गतिबिधिहरु सुचारु हुने अवस्था श्रृजना गर्नु पर्दछ  । अन्य समस्याहरु समेत प्राथमिकता तोकि समाधान गनु पर्दछ । म सिंगो स्थायी समितिको बैठकको ध्यानाकर्षण गर्दै यसबारे छलफल एंव तत्काल निर्णयमा पुग्नका लागि यो विषेश प्रस्ताव प्रस्तुत गर्दछु ।
                                             

 जनार्दन शर्मा(क.प्रभाकर)
 मितिः२०७७÷०८÷२१                             स्थायी कमिटी सदस्य 
                                              नेपाल कम्युनिस्ट पार्टी(नेकपा)