शनिवार, कार्तिक १५ गते २०८३
- ट्रेण्डिङ :
- # समाज
- # मनाेरञ्जन
विवेकशील नेपाली र साझा पार्टीको एकीकरण भएसँगै नयाँ बनेको विवेकशील साझा पार्टीको घोषणा भएको छ । दुई पार्टी एक भएको घोषणा अनलाइनबाटै गरिएको हो ।
पदीय बाँडफाँट मिलेसँगै दुई पार्टी एक भएको घोषणा भएको हो । नयाँ बनेको पार्टीको अध्यक्ष रविन्द्र मिश्र तथा संयोजक मिलन पाण्डे चयन भएका छन् । मिश्र तत्कालीन साझाका तथा पाण्डे विवेकशीलका अध्यक्ष हुन् ।
नयाँ बनेको पार्टीको २६ सदस्सीय सचिवालय तथा १ सय ३० जनाको केन्द्रीय समिति बनेको छ । यी दुबै समितिमा तत्कालीन दुबै पार्टीका बराबर सदस्य रहेका छन् । सबै पदहरु बराबरीको आधारमा बाँडफाँट भएको हो ।
गत स्थानीय र संसदीय निर्वाचनमा आएको मतपरिणाम र जनताको चाहनाअनुसार दुई पार्टी एक भएको अध्यक्ष मिश्रले बताएका छन् । यस्तै संयोजक पाण्डेले जनचाहना अनुरुप वैकल्पिक शक्ति बन्नका लागि र लोकतान्त्रिक पार्टीको रुपमा अब्बल बन्नका लागि आफूहरुले एकीकरण गरेको बताएका छन् ।
यसअघि एकीकरण भएर पनि फुटेका यी दुई पार्टीको अहिले एकीकरण प्रक्रियामा असन्तुष्ट विवेकशीलकी उपाध्यक्ष अजिता राईसहित १३ जना केन्द्रीय सदस्यले एकीकरणमा सामेल नहुने बताइसकेका छन् । उनीहरुले एकताको औचित्यमै प्रश्न उठाएका छन् ।
यसअघिको एकीकरण, मतभिन्नता र विग्रह किन र अहिलेको एकीकरणको औचित्य के हो भन्ने विषयमा प्रष्ट नभएकाले आफूहरु एकतामा सामेल नभएको उनीहरुको भनाई छ । अहिलेको एकीकरण आगामी २ महिनामा तल्लो तहसम्म सक्ने सहमति भने दुई पार्टीबीच भइसकेको छ ।
