- ट्रेण्डिङ :
नेपाल कम्युनिष्ट पार्टी (नेकपा) को स्थायी कमिटी बैठक आज दिउँसो प्रधानमन्त्री निवास बालुवाटारमा बस्दैछ । पार्टी कार्यालयमा बस्ने तय भएको बैठक पछिल्लो समय बालुवाटारमै तय भएको स्थायी कमिटी सदस्य हरिबोल गजुरेलले जानकारी दिए । ‘हामीलाई बालुवाटारमा दिउँसो १ बजेका लागि भनिएको छ’ उनले भने ।
पार्टी कार्यालय धुम्बाराहीमा मंसिर २१ गते बसेको स्थायी कमिटी बैठकमा अध्यक्ष तथा प्रधानमन्त्री ओलीले दुई पन्ने पत्र पठाएर अनुपस्थित भएका थिए । सो दिनको बैठक केहीबेर बसेर आज बस्ने गरी टुंगिएको थियो ।
मंसिर २१ गतेको बैठकमा पनि प्रधानमन्त्री ओली सहभागी हुने भनिएको थियो । उनले इश्वर पोखरेलमार्फत पत्र पठाएर अनुपस्थित भए ।
महासचिव विष्णु पौडेलले आजको बैठकमा प्रधानमन्त्री तथा अध्यक्ष ओली सहभागी हुने बताएका छन् । तर, ओलीले अघि सारेको शर्त पूरा नहुँदा उनी सहभागी हुने सम्भावना कम रहेको ओली निकट एक स्थायी कमिटी सदस्यले बताए ।
अध्यक्ष ओलीले कार्यकारी अध्यक्ष प्रचण्डको आरोपपत्र फिर्ता नहुञ्जेल बैठकमा सहभागी नहुने बताएका छन् । उनले आफू निकट नेताहरुमार्फत दुवै अध्यक्षको प्रतिवेदन फिर्ता गरेर नयाँ प्रतिवेदन पेश गरेर अघि बढ्नसमेत प्रस्ताव गरेका छन् ।
मंसिर २४ गते दुई अध्यक्षको भेटवार्ता पनि भएको छ । सो बैठक कुनै निष्कर्षमा पुग्न नसकेको बुझिएको छ ।
बैठकको वातावरण बनाउन नेताहरुको सक्रियता पनि चलेकै छ । गुटगत भेला, बैठक र छलफल पनि भइरहेका छन् । हिजो मात्र शंकर पोखरेलले पनि खुमलटार पुगेर कार्यकारी अध्यक्ष प्रचण्डसँग सम्वाद गरेका छन् ।
स्थायी कमिटी बैठकमा पेश हुने ठोस योजना छैन । आज बस्ने बैठकमा स्थायी कमिटी सदस्यहरुले बोल्ने बताइएको छ । सचिवालयले ठोस एजेण्डा तय गरेको छैन । बैठकमा ओली र प्रचण्डका दुईवटा प्रस्ताव र विभिन्न चिठीपत्रहरु प्रस्तुत भएका छन् ।
