- ट्रेण्डिङ :
नेपाल कम्युनिष्ट पार्टी (नेकपा)को केन्द्रीय समितिको आकस्मिक बैठक भोलि बोलाएको छ । कार्यकारी अध्यक्ष पुष्पकमल दाहाल प्रचण्डले भोलिका लागि बैठक बोलाएका हुन् । अर्का अध्यक्ष केपी शर्मा ओलीले संसद विघटन गरेपछि उत्पन्न राजनीतिक परिस्थितिबारे छलफल गर्न भोलि बैठक बोलाइएको हो ।
बैठक काठमाडौंको बबरमहलस्थित कार्की व्याङ्क्वेटमा दिनको १ बजेका लागि बोलाइएको केन्द्रीय कार्यालय सचिव श्रीराम ढकालले जनाएका छन् ।
प्रधानमन्त्री ओलीले प्रतिनिधिसभा विघटन गरेपछि ओली र प्रचण्ड पक्षको छुट्टाछुट्टै भेला र छलफल हुँदै आएका छन् ।
केन्द्रीय समितिका सबैलाई बैठकमा आउन भनिएपनि ओली पक्षधर केन्द्रीय समिति सदस्यहरुले भने बहिष्कार गर्ने भएका छन् । एक केन्द्रीय सदस्यले भने, ‘प्रचण्डले बोलाएको बैठकमा हामी जाँदैनौं ।’
बैठकमा उपस्थित हुनका लागि डाकिएको सूचना यस्तो छ–
नेपाल कम्युनिष्ट पार्टी (नेकपा) को केन्द्रीय समितिको आकस्मिक बैठक भोलि २०७७ पौष ७ गते १ः०० बजे कार्की व्याङ्केट, बबरमहल, काठमाडौंमा हुने भएकाले उपस्थितिको लागि अनुरोध छ । – श्रीराम ढकाल, सचिव, केन्द्रीय कार्यालय
