शनिवार, कार्तिक १५ गते २०८३
- ट्रेण्डिङ :
- # समाज
- # मनाेरञ्जन
सत्तारुढ नेपाल कम्युनिष्ट पार्टी (नेकपा) ले पार्टीका अध्यक्ष केपी शर्मा ओलीलाई कारबाही गरेको जानकारी पत्र निर्वाचन आयोगमा बुझाएको छ । सोमबार नेकपा स्थायी कमिटी सदस्य लीलामणि पोखरेलले अध्यक्ष ओलीलाई कारबाही गरिएको पत्र आयोगमा बुझाएका हुन् ।
आयोगलाई बुझाइएको पत्रमा अध्यक्ष ओलीलाई कारबाही गरिनुका सबै कारण समेत खुलाइएको बताइएको छ । संसद विघटन गर्ने निर्णयपछि आइतबार दिउँसो बालुवाटारमा बसेको नेकपा स्थायी समिति बैठकले ओलीलाई अध्यक्षबाट हटाउने निर्णय गर्दै अनुशासनको कारबाही गरेको थियो । सो निर्णयलाई आज निर्वाचन आयोगको कार्यालय पुगेर जानकारी गराइएको पोखरेलले जानकारी दिएका छन् ।
‘अध्यक्ष केपी ओलीलाई कारबाही गर्न स्थायी कमिटीले निर्णय गरिसकेको र त्यसलाई अनुमोदन केन्द्रीय समित बैठकले गर्ने जानकारी निर्वाचन आयोगलाई गराउनु पर्छ । किनभने, आयोगले स्थायी कमिटी चिन्दैन । केन्द्रीय कमिटी मात्रै चिन्ने भएकाले सो बारेको जानकारी गराएर आएका छौँ’, पोखरेलले भने । आजै संसद विघटनविरुद्ध नेकपा अध्यक्ष पुष्पकमल दाहाल ‘प्रचण्ड’ र माधवकुमार नेपाल समूहका ८५ निवर्तमान सांसदले हस्ताक्षर संकलन गरेका छन् ।
