- ट्रेण्डिङ :
एजेन्सी । ब्राजिलका राष्ट्रपति जाइर बोल्सोनारु कोरोना भाइरसबाट संक्रमित भएका छन्। ज्वरोसहितको लक्षण देखिएपछि उनको सोमबार परीक्षण गरिएको थियो । बोल्सोनारुले पटकपटक मामुली फ्लु भन्दै कोरोना भाइरसको गम्भीरतालाई कम आँक्दै आएका थिए ।
रोग लागिहालेमा पनि आफूलाई त्यसले गम्भीर असर नगर्ने बताउँदै आएका थिए । ब्राजिलका राष्ट्रपतिले अर्थतन्त्रलाई असर गर्ने भन्दै लकडाउन गर्न मानेका थिएनन्। त्यस्तै उनले ज्वरो कम भइरहेको र आफूले ठीकै महसुस गरिरहेको पनि बताएका थिए।
आइतबारदेखि ज्वरो र खोकीसहित बिरामी भएको महसुस गरेको पनि उनले बताएका थिए । सोमवार थप असहज भएपछि कोरोना भाइरसको परीक्षण गरिएको थियो । ६५ वर्षीय बोल्सोनारु उमेरका कारण जोखिम समूहमा पर्छन ।
उनले अमेरिकी राष्ट्रपति डोनल्ड ट्रम्पले बताएको औलोविरुद्धको औषधि हाइड्रोक्सीक्लोरोक्वीन तथा एन्टीबायोटिक एजिथ्रोमाइसिन लिइरहेको बताएका छन् । दुवै औषधिले कोरोना भाइरसविरुद्ध काम गर्छ भन्ने कुनै प्रमाण छैन।
पछिल्लो समय यी दुवै औषधि कोरोना संक्रमितको उपचारमा प्रयोग गर्न नहुने भन्दै विज्ञहरुले सुझाउँदै आएका छन । अब राष्ट्रपति बोल्सोनारुको सम्पर्कमा आएका मानिसहरूको पनि परीक्षण गरिनेछ । यसअघि पनि तीन पटक बोल्सोनारुको परीक्षण गरिएको थियो। त्यसबेला उनमा संक्रमण पुष्टि भएको थिएन।
