- ट्रेण्डिङ :
नेपाल कम्युनिष्ट पार्टी (नेकपा)का अध्यक्ष पुष्पकमल दाहाल 'प्रचण्ड'ले आफूलगायत पार्टी नेताविरुद्ध सडकमा भइरहेको प्रदर्शन रोक्न प्रधानमन्त्री केपी शर्मा ओलीसँग आग्रह गरेका छन् ।
ओली निकट युवा विद्यार्थीले सडकमा प्रचण्डसहितका नेकपा नेताहरुविरुद्ध प्रदर्शन गरेपछि प्रचण्डले तत्काल सडकमा भएको प्रदर्शन रोक्न आग्रह गरेका हुन् ।
प्रधानमन्त्री एवं नेकपा अध्यक्ष ओली निकट युवा विद्यार्थीले प्रचण्डसहित नेकपा नेताहरुविरुद्ध सामाजिक सञ्जालमा विभिन्न आरोप लगाएर लेखेका थिए । त्यस्तै ठाउँ ठाउँमा प्रदर्शन भएपछि प्रचण्डले ओलीलाई यस्तो आग्रह गरेका प्रचण्डको सचिवालयले जनाएको छ ।
स्रोतका अनुसार प्रचण्डले भने, 'तपाईँले तत्काल प्रदर्शन रोक्नुस् । यसले पार्टी एकतालाई फाइदा गर्दैन । अर्को पक्षले पनि ठूलो संख्यामा प्रदर्शन गरेमा त्यसको परिणाम के हुन्छ ? त्यसैले सामाजिक सञ्जालमा गरिएका गलत टिप्पणी रोकेर र सडक प्रदर्शनका नाम भएका क्रियाकलाप रोकेर तपाईँले पहल लिनुपर्छ । यसले पार्टी एकतालाई राम्रो गर्दैन ।'शीर्ष नेताहरु वार्ता र संवादकै क्रममा रहेका बेला ओलीले आफू निकट युवा विद्यार्थीलाई बालुवाटार बोलाएर सडक प्रदर्शन चर्काउन निर्देशन दिएका थिए ।
