शनिवार, कार्तिक १५ गते २०८३
- ट्रेण्डिङ :
- # समाज
- # मनाेरञ्जन
एजेन्सी । कोरोना भाइरसको संक्रमण तीव्रतर बन्दै गएपछि ब्रिटेनमा लकडाउनको घोषणा गरिएको छ ।बेलायतका प्रधानमन्त्री बोरिस जोनसनले सोमबार बेलुका देशवासीका नाममा सम्बोधन गर्दै सोमबार रातिदेखि लागु हुनेगरी लकडाउनको घोषणा गरेका हुन् ।उनले देशवासीलाई नयाँ नियमको पालना गर्न अपील गरेका छन् । उनले अत्यावश्यकीय कामबाहेक घरमै बस्न अनुरोध गरेका छन् ।
बेलायतबासीलाई यदि घरबाट काम गर्न नसक्ने अवस्थामा, अत्यावश्यक खाद्यान्न वा ओैषधि किन्न, शारीरिक कसरतका लागि, जोखिममा रहेका व्यक्तिहरुलाई हेरचाह गर्न र चिकित्सकीय भेट वा हिंसाबाट जोगिनका लागि मात्र घरबाट निस्कन मिल्नेछ ।
शारीरिक अभ्यासका क्रममा एकाघरमा बस्नेबाहेकका एक जनासंग मात्रै भेट्न पाइनेछ ।
त्यस्तै विद्यालय, कलेज र विश्वविद्यालयका पढाई मंगलबारदेखि नै अनलाइनका माध्यमबाट हुनेछन् । तर नर्सरीहरु भने खुला रहनेछन् ।
ब्रिटेनमा यो तेस्रो पटकको देशब्यापी लकडाउन हो । यो लकडाउन फेब्रुअरीको मध्यसम्म रहने बताइएको छ ।
उता स्कटल्याण्डमा पनि आज मध्यरातबाटै लकडाउन लागू गरिएको छ । वेल्समा पनि जनवरी १८ सम्मका लागि सबै विद्यालयहरु अनलाइनमा सञ्चालन हुने बताइएको छ ।
सरकारले ल्याएको नयाँ कानुनमाथि छलफल र मतदानका लागि बुधबार भर्चुअलरुपमा बेलायतको संसद बैठक बोलाइएको एपी न्युजले जनाएको छ ।
ब्रिटेनमा कोरोना संक्रमणबाट हालसम्म ७५ हजार ४३१ जनाको मृत्यु भएको छ भने कुल संक्रमितको संख्या २ करोड ७१ लाख ५ सय नाघेको छ ।
