- ट्रेण्डिङ :
भारतले केही साताभित्रै नेपाललगायतका छिमेकी देशहरूमा कोरोनाविरुद्धको खोप पठाउने भएको छ । यसलाई ‘खोप कूटनीति’ भनेको भारतले शुरुमा आफ्ना छिमेकी राष्ट्र र त्यसपछि अन्य देशका लागि खोप निर्यात गर्ने भएको हो ।
छिमेकी देशमध्ये सबैभन्दा पहिलो नम्बरमा नेपाललाई राखिएको भारतको भ्रमण सकेर फर्केका परराष्ट्रमन्त्री प्रदीप ज्ञवालीको भनाइ भन्दै स्वास्थ्य मन्त्रालयले जानकारी दिएको छ ।
भारतले विश्वमै संकट उत्पन्न गराएको रोग कोरोनाविरुद्धको खोप सर्वसाधारणलाई लगाउन गत शनिबारदेखि नै शुरु गरिसकेको छ । भारतमा पहिलो दिनमै २ लाखभन्दा धेरै मानिसलाई खोप लगाइएको छ ।
शुरुमा ३ करोड सरसफाइकर्मी र स्वास्थ्यकर्मीलाई खोप लगाइने योजना भारतले बनाएको छ । त्यसका लागि सेरम इन्स्टिच्युटको ‘कोभिसिल्ड’ र भारत बायोटेकको ‘कोभ्याक्स’ दुवै खोप प्रयोगमा ल्याइएको छ ।
नेपालले पनि ‘कोभिसिल्ड’लाई आपतकालीन प्रयोगका लागि स्वीकृति दिइसकेको छ । भारतले नेपालसँगै भुटान, बंगलादेश, म्यानमार, श्रीलंका, अफगानिस्तान, माल्दिभ्सलगायतका देशमा पहिलो चरणको खोप निर्यात गर्ने जनाएको छ । त्यसपछि मात्रै भारतले तेस्रो देशमा खोप निर्यात गर्ने जनाइएको छ ।
नेपालले अहिले भारत सरकारसँग मात्रै खोप किन्ने प्रस्ताव अघि सारेको बुझिएको छ । तर अन्य देशहरुले भने कम्पनीसँग नै सम्झौता गरिसकेका छन् । म्यानमारले सेरम इन्स्टिच्युटसँग खोप किन्ने सम्झौता गरिसकेको छ । भारतीय विदेशमन्त्री एस जयशंकरले श्रीलंकाको नेतृत्वसँग पनि खोप पठाउन प्रतिबद्धता जनाएका छन ।
भारतले छिमेकी देशलाई निर्यात गर्ने खोपको मूल्य धेरै महंगो नहुने र सकभर भारतमै उपलब्ध मूल्यमा दिने योजना बनाइरहेको विदेश मन्त्रालयले जनाएको छ । परराष्ट्रमन्त्री ज्ञवालीलाई प्रधानमन्त्री मोदीको सन्देश सुनाउँदै जय शंकरले नेपालमा पहिलो प्राथमिकताका साथ खोप पठाउन भारत प्रतिबद्ध रहेको बताएको स्रोतले जनाएको छ ।
नेपालले सम्बन्धित मुलुकको सरकारसँगै सम्झौता गरेर खोप किन्ने नीति अख्तियार गरेको छ भने निजीक्षेत्रलाई पनि खोप किन्न अनुमति दिएको छ । भारतमा कोरोना खोप लगाएकामध्ये केहीमा त्यसको सामान्य असर देखिएको जनाइएको छ ।
भारतको स्वास्थ्य मन्त्रालयका अनुसार ४ सय ४७ जनामा खोपको नकारात्मक असर देखिएको छ । त्यसलाई चिकित्सकहरूले एईएफआई (एडभर्स इभेन्ट्स फ्लोइङ इम्युनाइजेसन) भनेका छन् । त्यसबाट कोही पनि गम्भीर नभएको समाचार छ ।
