आइतवार, कार्तिक १६ गते २०८३
- ट्रेण्डिङ :
- # समाज
- # मनाेरञ्जन
नेपाल कम्युनिस्ट पार्टी विप्लव समूहका महासचिव नेत्रविक्रम चन्द विप्लवले सहिदहरुलाई सम्झँदै उनीहरुको सपना मर्न नदिने बताएका छन् । राजधानीको राष्ट्रिय सभा गृहमा आयोजित सहमति पत्रमा हस्ताक्षर कार्यक्रमलाई सम्बोधन गर्दै उनले यस्तो बताएका हुन् । आगामी दिनमा नागरिकको सुरक्षा, समाज रुपान्तरण लगायतका महत्वपूर्ण काममा आफ्नो भूमिका उस्तै रहने पनि विप्लवले बताए । नेपाली जनताको श्रम र क्षमताले देश बनाउने अठोट गर्नु पर्ने बताउँदै उनले श्रमजीवी वर्गले अझै न्याय नपाएकाले यसमा राज्यको ध्यान जानु पर्ने उल्लेख गरे । राजनीतिक दलहरुले जनताका साझा समस्यालाई सम्बोधन गर्नु पर्नेमा त्यसो हुन नसकेपछि यस अघि आफूहरु विद्रोहमा जानु परेको विप्लवले खुलासा गरे । सरकार र विप्लव समूहबीच सहमति भए अनुसार आज हस्ताक्षर भएको हो । सरकारका तर्फबाट गृहमन्त्री रामबहादुर थापा र नेकपा विप्लव समूहका तर्फबाट खड्गबहादुर विश्वकर्माले संयुक्तरुपमा हस्ताक्षर गरेका हुन् । सरकारसँग तीनबुँदे सहमति भएपछि नेपाल कम्युनिस्ट पार्टीका महासचिव नेत्रविक्रम चन्द विप्लव प्रहरी सुरक्षासहित आजै राजधानी आएका थिए । मंगलबार सरकार र विप्लव दुवै समूहले आआफ्ना वार्ता टोली गठन गरेका थिए । बुधबारदेखि नै सुरु भएको वार्ता बिहीबार सहमतिमा टुंगोमा पुगेको थियो । सरकार र हिंसात्मक आन्दोलन गरिरहेको विप्लव नेतृत्वको नेपाल कम्युनिस्ट पार्टीबीच राजधानीमा जारी वार्ता सफल भएपछि तीन वर्षदेखि भूमिगत विप्लव राजधानी आएका हुन् । सरकारले ०७५ फागुन २८ गते विप्लव समूहमाथि प्रतिबन्ध लगाएपछि विप्लव कुनै पनि सार्वजनिक कार्यक्रममा सहभागी भएका थिएनन् । सहमतिपत्रमा हस्ताक्षर हुनु अघि आजै प्रधानमन्त्री केपी शर्मा ओली र विप्लवबीच बालुवाटारमा भेटवार्ता भएको थियो । विप्लव समूह शान्तिपूर्ण राजनीतिमा आउन सहमत भएपछि सरकारले उक्त समूहमाथि लगाएको प्रतिबन्ध हटाइसकेको छ । आजदेखि विप्लव समूहका पक्राउ परेका नेता कार्यकर्तालाई क्रमिक रुपमा रिहाइ गर्दै लगिने सरकारले जनाएको छ। आजै विप्लव समूहका नेता धर्मेन्द्र बाँस्तोला काभ्रेबाट रिहा भइसकेका छन्।
