आइतवार, कार्तिक १६ गते २०८३
- ट्रेण्डिङ :
- # समाज
- # मनाेरञ्जन
आश तमु पोखरा - म्याग्दीका नहकुल सुवेदी सर्वोच्च अदालतको न्यायाधीशमा सिफारिस भएका छन ।
न्याय परिषद्को शुक्रबार बसेको बैठकले म्याग्दीको रघुगंगा गाउँपालिका-२ भगवतीका सुवेदीलाई सर्वोच्चको न्यायाधीशमा सिफारिस गरेको हो ।
उच्च अदालत सुर्खेतमा कार्यरत सुबेदी न्यायालयको क्षेत्रमा सबैभन्दा माथिल्लो तहमा पुग्ने एक मात्रै म्याग्देली हुन । यस अगाडी न्याय परिषद्का सचिब, सर्वोच्च अदालतका मुख्य रजिष्ट्रारको समेत जिम्मेबारी सम्हालि सकेका छन् सुवेदीले ।
यसैबीच जिल्ला अदालत म्याग्दीमा न्यायाधीश माधवेन्द्र रेग्मीलाई उच्च अदालतको न्यायाधीश सिफारिस गरिएको छ ।
सर्वोच्च अदालतमा सिफारिस भएका २ जनालाई संसदीय सुनुवाई समितिले अनुमोदन गरी राष्ट्रपतिले नियुक्ति गर्ने व्यवस्था छ। उच्च अदालतको न्यायाधीशमा सिफारिस भएकालाई प्रधानन्यायाधीशले नियुक्ति गर्ने कानुनी व्यवस्था छ।
न्यायपरिषद्को शुक्रबार बसेको बैठकले सर्वोच्च अदालत र उच्च अदालतमा न्यायाधीश नियुक्तिको सिफारिस गरेको हो । सर्वोच्च अदालतमा दुई र उच्च अदालतमा १८ जना न्यायाधीश नियुक्तिका लागि सिफारिस भएको हो ।
उच्च अदालतका वरिष्ठ मुख्य न्यायाधीशबाट कुमार चुँडाल र नहकुल सुवेदीलाई सर्वोच्च अदालतमा नियुक्ति सिफारिस गरिएको हो । उच्च अदालतमा १८ जनाको सिफारिस भएको छ । उच्चमा सरकारी वकिलका तर्फबाट नायवमहान्यायाधिवक्ता नारायणप्रसाद पौडेल, कानुनसचिव ऋषि राजभण्डारी नियुक्त भएका छन् ।
जिल्ला न्यायाधीशबाट जगतनारायण प्रधान, माधवेन्द्र रेग्मी, पुरुषोत्तमप्रसाद ढकाल, विष्णु सुवेदी, अर्जुनप्रसाद कोइराला, अमृतबहादुर बस्नेत र मोदिनीप्रसाद पौडेलको सिफारिस भएको छ । सुनसरी जिल्ला अदालतमा कार्यरत कोइराला बलात्कार मुद्दामा सिद्धबाबालाई सफाइ दिने न्यायाधीश हुन् ।
न्यायसेवाका सहसचिवद्वय रामेश्वर रेग्मी र ममता खनाल पनि उच्च अदालतको न्यायाधीशमा सिफारिसमा अटाएका छन्। कानुन व्यवसायीबाट फुर्वा तामाङ, श्रीधराकुमारी पुडासैनी, जगदीश घिमिरे, पुनमसिंह चन्द, सागर विष्ट, गणेश ठाकुर र निर्मला शाक्यको सिफारिस भएको छ ।
प्रधानन्यायाधीश चोलेन्द्रशमशेर राणाको अध्यक्षतामा बसेको बैठकले उनीहरूको सिफारिस गरेका हाे । न्यायपरिषद्का सदस्य रहेका सर्वाेच्चका वरिष्ठतम न्यायाधीश दीपककुमार कार्कीले अर्जुनप्रसाद कोइरालाको सिफारिसमा नोट अफ डिसेन्ट लेखेका छन् ।
