- ट्रेण्डिङ :
कोरोना भाइरसका कारण साढे २ महिनादेखि बलिउडको काम ठप्प छ । धेरै फिल्म सुटिङ र रिलिज अड्किएको छ । जसले गर्दा फिल्मको बजेट पनि प्रभावित भएको छ ।
फिल्म समीक्षकका अनुसार बलिउडलाई ३ हजारदेखि ४ हजार करोड रुपैयाँको नोक्सान हुनेछ । यो संकटकालमा फिल्म निर्देशकको आर्थिक स्थिति हेरेर बलिउडका केही स्टार आफ्नो पारिश्रमिक घटाउन तयार भएका छन् ।
एक अन्तर्वार्तामा माधुरी दीक्षितले भनेकी छिन्, ‘हामीले निर्मातालाई सपोर्ट गर्ने बेला आएको छ । हामी सबै ठीक तरिकाले काम होस् भन्न चाहन्छौँ । त्यसैले हामीले आफ्नो पारिश्रमिक घटाउन जरुरी छ ।’बलिउडका अभिनेता कार्तिक आर्यनले पनि पारिश्रमिक घटाउन इच्छा व्यक्त गरेका छन् ।
‘सान्डकी आँख’ अभिनेत्री तापसी पन्नूले पनि पारिश्रमिक घटाउने बताएकी छिन् । उनले भनिन्, ‘अहिले कुनै पनि सुटिङ भइरहेको छैन । त्यसैले तबल पनि पाइएको छैन । काम सुरू भएपछि पारिश्रमिक घटाउनु पर्यो भने म पनि तयार छु ।’ यो समाचार अन्नपूर्ण पोस्ट् दैनिकमा विस्तृतमा छ ।
