आइतवार, कार्तिक १६ गते २०८३
- ट्रेण्डिङ :
- # समाज
- # मनाेरञ्जन
पोखरा । सर्वोच्च अदालतमा प्रधानमन्त्री केपी शर्मा ओलीलाई राष्ट्रपति विद्यादेवी भण्डारीले गराएको शपथविरूद्ध रिट पेश भएको छ । प्रधानमन्त्रीले लिएको शपथ कानुनविपरीत भएकाले बदर गर्न माग गर्दै अधिवक्ता चन्द्रकान्त ज्ञवाली र अधिवक्ता सन्तोष भण्डारीले छुट्टाछुट्टै रिट पेश गर्नुभएको हो ।
तर दुवै रिट दर्ता भने भएका छैनन् । भण्डारीको रिटमा पुर्याउनु पर्ने रित पूरा नभएको र ज्ञवालीको रिट अध्ययनकै क्रममा रहेकाले आज दर्ता गर्न नसकिएको सर्वोच्चको रिट महाशाखाले जनाएको छ।
प्रधानमन्त्री केपी शर्मा ओलीले शुक्रबार पद तथा गोपनीयताको शपथ ग्रहण गर्दा दुइटा महत्वपूर्ण अंश भन्न छुटाउनुभएको थियो ।
मुलुक र जनताप्रति पूर्ण बफादार रही सत्य निष्ठापूर्वक यो प्रतिज्ञा गर्छु कि भनेर राष्ट्रपति विद्या भण्डारीले शपथ गराउँदा ओलीले यो प्रतिज्ञा गर्छु कि’ भन्ने वाक्यांश छुटाउनुभएको थियो ।
प्रधानमन्त्री ओलीले छुटाएको उक्त वाक्यांश राष्ट्रपति भण्डारीले पुनः दोहोर्याए पनि ओलीले यो पर्दैन भन्दै शपथग्रहण अगाडि बढाउनुभएको थियो ।
शपथ ग्रहणका वाक्यांश जानाजान छुटाएर प्रधानमन्त्री ओलीले शपथको गरिमा लत्याएको र राष्ट्रपतिको समेत मानमर्दन गरेको भन्दै चर्को आलोचना भएको छ ।
