एजेन्सी । कोरोना भाइरसको संक्रमण ह्वात्तै बढेको छ । पछिल्लो २४ घन्टामा कोरोना संक्रमितको संख्या झण्डै तीन लाख पुगेको छ ।संसारभर पछिल्लो २४ घन्टामा संक्रमितको संख्या २ लाख ८८ हजार ३ सय ५८ थपिएको छ ।
यो संख्या अहिलेसम्मकै धेरै हो । हिजो संक्रमितको संख्या २ लाख ७९ हजार पुगेको थियो । सबैभन्दा धेरै अमेरिकामा एकदिन ७७ हजार ९ सय ८९ जनामा कोरोना संक्रमण भएको छ । ब्राजिलमा ५८ हजार २ सय ४९ जना र भारतमा ४८ हजार ८ सय ९२ जनामा कोरोना संक्रमण भएको छ ।
पछिल्लो २४ घन्टामा दक्षिण अफ्रिकामा १३ हजार ९ सय ४४, मेक्सिकोमा ८ हजार ४ सय ३८, कोलम्वियामा ७ हजार १ सय ६८, अर्जेन्टिनामा ५ हजार ४ सय ९३ र रसियामा ५ हजार ८ सय ११ जनामा कोरोना संक्रमण भएको छ । लकडाउन खुकुलोसँगै संसारभर संक्रमितको संख्या ह्वात्तै बढेको विश्व स्वास्थ्य संगठनले जनाएको छ । जोखिम थप बढ्दै गएको छ । हरेक दिन झण्डै ३ लाखको हाराहारीमा नयाँ संक्रमित थपिन थालेका छन् ।
