- ट्रेण्डिङ :
पोखरा । प्रधानमन्त्री केपी शर्मा ओली नेतृत्वकाे सरकारमा रघुवीर महासेठ दोस्रो पटक मन्त्री बनेका छन् । धुनषा ४ का सांसद महासेठलाई उपप्रधानमन्त्री सहित परराष्ट्र मन्त्रालयको महत्वपूर्ण जिम्मेवारी दिइएको छ ।
यस अघि महासेठ भौतिक पूर्वाधार तथा यातायातमन्त्री थिए । प्रधानमन्त्री ओलीले ५ मंसिर २०७६ मा महासेठलाई हटाएर बसन्त नेम्वाङलाई मन्त्री बनाए । तर यसपटक महासेठ उपप्रधानमन्त्री समेत बनेका छन् । महासेठ विष्णुप्रसाद पौडेलपछिको वरीयतामा उपप्रधानमन्त्री बनेका छन् । एमालेभित्र वामदेव गौतम निकट भनेर चिनिने महासेठ गुट फेर्दै २०७४ मा मन्त्री बनेका थिए । तर कार्यसम्पादन चित्त नबुझेको भन्दै प्रधानमन्त्री ओलीले पदमुक्त गरेका थिए । तिनै महासेठले यसपटक परराष्ट्र जस्तो महत्वपूर्ण भूमिका पाएका छन् । यसपटक पनि महासेठले पुरानै शैली अपनाए ।
गएको ५ पुसमा साविकको नेपाल कम्युनिष्ट पार्टी (नेकपा) विभाजित हुँदा महासेठ ओली इतर समूहतिर उभिएका थिए । एमालेका वरिष्ठ नेता माधवकुमार नेपालसँग नजिक हुँदै ओली इतर केही कार्यक्रममा समेत सहभागी भए । तर केही दिनमै फेरि बालुवाटारतिर नजिक भए । ओलीलाई साथ दिए बापत गएको १० पुसमा महासेठकी पत्नी जुली महतो मन्त्री बनिन् । एमालेका समानुपातिक सांसद महतोले महिला, बालबालिका तथा समाज कल्याण मन्त्रीको जिम्मेवारी पाएकी थिइन् । तर महतो पाँच महिनापछि पदमुक्त भएकी छन् । अर्थात् ओली नेतृत्वको सरकारमा महासेठ महतो दम्पती आलोपालो मन्त्री बनेका छन् ।
