- ट्रेण्डिङ :
नेपाली फिल्म ‘एक्स ९– लेभल १’ मा बलिउड अभिनेता सुनील शेट्टीले पनि देखिने भएका छन् । निर्देंशक मुकुन्द भट्टका अनुसार एक महिना अगाडि फिल्म अभिनयको बिषयमा शेट्टीसँग कुराकानी भएको हो । भट्टले शेट्टीलाई फिल्मको भिलेनको रुपमा अफर गरेका थिए । शेट्टी पनि अभिनयका लागि राजी भएको भट्टको भनाई छ ।
आफ्नो फिल्म ‘एक्स ९–लेभल १’ मा शेट्टी रहने निर्देशक भट्टले बताउँदै आएपनि शेट्टीले भने नेपाली फिल्म अभिनय बिषयमा अहिलेसम्म आधिकारिक धारणा बाहिर ल्याएका छैनन् । फिल्म ‘एक्स ९– लेभल १’ मा नेपाली कलाकार अनमोल केसी, पुष्प खड्का र सौगात मल्ल रहने चर्चा छ । तिहारपछि छायाँंकन हुने बताइएको फिल्मका कार्यकारी निर्मातामा सरोज रिजाल र निर्मातामा यादव प्रसाद पाठक हुन् ।
निर्देशक भट्टको ‘लप्पन छप्पन’ का दुबै सिरिज एक्सनमा आधारित छन् । अहिले भने उनी तेस्रो फिल्म ‘एक्स ९–लेभल १’ को तयारी गर्दैछन् । जसको घोषणा उनले केही पहिले गरेका थिए । यो नेपालकै सबैभन्दा ठूलो एक्सन–थ्रिलर फिल्म हुने दाबी निर्माण युनिटको रहेको छ । नेपालका चलेका कलाकार लिएर फिल्म बनाउने भट्टको अबको फिल्म ‘एक्स ९– लेभल १’ मा बलिउड अभिनेता सुनील शेट्टी पनि रहने बताइएको छ ।
