शनिवार, कार्तिक १५ गते २०८३
- ट्रेण्डिङ :
- # समाज
- # मनाेरञ्जन
पोखरा । आज सबेको नेकपा एमालेको स्थायी कमिटीको बैठकमा उपाध्यक्ष वामदेव गौतम अनुपस्थित भएका छन् ।
यस अघि असार १८ र १९ गते बसेको केन्द्रीय कमिटी बैठकमा गौतम सहभागी भएका थिए । असार २८ गते बालुवाटारमा बसेको स्थायी कमिटीको अनौपचारिक बैठकमा पनि गौतम सहभागी थिए ।
पुष्पलाल स्मृति प्रतिष्ठानको हलमा जारी शुक्रवारको स्थायी कमिटी बैठकमा गौतम उपस्थित भएका छैनन् ।
असार १८ गते केन्द्रीय कमिटी बैठकलाई सम्बोधन गर्दै गौतमले आफू कुनै पक्षमा नलागेको र एकताको पक्षमा लाग्ने बताएका थिए ।
बैठकले पार्टी विवाद समाधानका लागि गठित कार्यदलले तयार पारेको एकतासम्बन्धी १०बुँदे प्रस्तावलाई अनुमोदन गर्दै कार्यान्वयनमा लैजाने निर्णय गरेको छ । पार्टी सचिव तथा प्रवक्ता प्रदीप ज्ञवालीले बैठकले उक्त प्रस्तावलाई ग्रहण गर्दै अनुमोदन गरेको र कार्यान्वयनमा लैजाने निर्णय भएको जानकारी दिए ।
पार्टी विवाद समाधानका लागि अध्यक्ष केपी शर्मा ओली र वरिष्ठ नेता माधव नेपाल पक्षबीच १० सदस्यीय कार्यदल गठन गरिएको थियो । उक्त कार्यदलले लामो समय लगाएर १० बुँदे प्रस्ताव तयार पारेको थियो । कार्यदलमा केपी शर्मा ओली पक्षबाट सुवास नेम्वाङको संयोजकत्वमा विष्णु पौडेल, प्रदीप ज्ञवाली, शंकर पोखरेल र विष्णु रिमाल र नेपाल समूहबाट भीम रावल संयोजकत्वमा सुरेन्द्र पाण्डे, घनश्याम भुसाल, गोकर्ण विष्ट, रघुजी पन्त रहेका थिए ।
यस्तै, बैठकले सक्रिय प्रतिपक्षका रूपमा रचनात्मक भूमिका निर्वाह गर्ने तथा पार्टीका सांसदहरूलाई देउवा सरकारले अगाडि सार्ने विश्वासको मतको विपक्षमा उभिन निर्देशन दिने निर्णय गरेको पनि नेता ज्ञवालीले जानकारी दिए । स्थायी कमिटीको बैठक सम्पन्न भएलगत्तै एमाले संसदीय दलको बैठक संसद् भवन नयाँ बानेश्वरमा आजै बस्नेछ ।
नेपाल समूहका कार्यदल सदस्यहरू भने बाहिरिए
य्दपी बैठकमा सहभागी भएका माधव नेपाल समूहका कार्यदल सदस्यहरू भने बाहिरिएका छन् । नेपाल समूहका कार्यदल सदस्यहरूले पार्टी एकतालाई अगाडि बढाउन बैठक स्थगित गर्न र कार्यदलले तयार पारेको १० बुँदे प्रस्तावमा छलफल गरेर अगाडि बढ्न आग्रह गरेका थिए ।
अध्यक्ष केपी ओलीले बैठक रोक्न नमानेपछि आफूहरू बैठकबाट बाहिरिएको नेता भीम रावलले बताए । बैठकमा माधव नेपाल समूहका नेता भीम रावल, घनश्याम भुसाल, गोकर्ण विष्ट, भीम आचार्य र सुरेन्द्र पाण्डे सहभागी भएका थिए ।
पार्टी एकता जोगाउन कार्यदलले तयार पारेको प्रस्तावको कार्यान्वयन गर्नुको कुनै विकल्प नभएको र त्यसका लागि आफ्नो समूह इमानदार रहेको नेता रावलले जानकारी दिए ।
पार्टी एकता जोगाउन अध्यक्षलाई गम्भीर र जिम्मेवार भएर प्रस्तुत हुनसमेत आग्रह गरिएको रावलले बताए । पार्टी स्थायी कमिटीको बैठक ललितपुरको च्यासलस्थित तुल्सीलाल स्मृति प्रतिष्ठानमा बसेको थियाे ।
