सोमवार, कार्तिक १७ गते २०८३
- ट्रेण्डिङ :
- # समाज
- # मनाेरञ्जन
शेरबहादुर देउवा प्रधानमन्त्री भएको दुई साता बित्दासमेत मन्त्रिपरिषद विस्तार हुन सकेको छैन । सत्तारुढ गठबन्धनमै रहेका दलहरुबीच सरकारमा सहभागी हुने वा नहुने भन्ने विषयमा टुंगो नलाग्दा मन्त्रिपरिषद विस्तारमा ढिलाई भएको हो । नेकपा एमालेको माधवकुमार नेपाल समूहले तत्काल सरकारमा सहभागी नहुने बताएको छ ।
प्रधानमन्त्री देउवा र नेकपा माओवादी अध्यक्ष पुष्पकमल दाहाल प्रचण्ड भने नेपाल पक्षलाई सरकारमा सहभागी गराउनैपर्ने अडानमा छन् । दिनदिनैजसो प्रचण्डले भेटेर माधव नेपाललाई सरकारमा सहभागिताका लागि परामर्श गरिरहेका छन् । बिहीबार बिहान पनि अध्यक्ष प्रचण्डले माधवकुमार नेपालसँग भेट गरी सरकारमा सहभागिताबारे छलफल गरेका छन् । बिहान प्रधानमन्त्री देउवासँग करिब एक घण्टा परामर्श गरेर निस्किएका प्रचण्ड कोटेश्वरस्थित नेपाल निवास पुगेका थिए ।
नेपाल निवासमा केहीबेर छलफल गरेका थिए । माधव नेपाल पक्षका सांसदहरुलाई पनि सरकारमा सहभागी गराउन कानुनी र राजनीतिक अप्ठ्यारा छन् । एमालेमा देखिएका समस्या समाधान गर्दै पार्टी एकता कायम राख्न पहल जारी रहेकाले पनि माधव नेपाल पक्ष तत्काल सरकारमा सहभागी हुने पक्षमा देखिएका छैनन् ।
सत्ता गठबन्धनलाई सशक्त रुपमै राख्नका लागि देउवा र प्रचण्ड भने माधव नेपाल पक्षलाई सरकारमा सम्मानजसक सहभागी गराएर लैजान तयार छन् । माधव नेपालसँगको भेटपछि प्रचण्ड माओवादीका प्रवक्ता नारायणकाजी श्रेष्ठको निवास हरिसिद्धि पुगेका थिए । नेता श्रेष्ठसँग केहीबेर परामर्श गरेपछि प्रचण्ड खुमलटार पुगेका थिए ।
